Siglir tar il cuntegn

Header

video
Stemprà Mathis ha laschà cupitgar dus trens
Or da Tagesschau dals 31.03.2023.
laschar ir. Durada: 1 minuta 4 Secundas.
cuntegn

Suffels d'orcan en la Bassa 15 persunas blessadas tar accidents da tren en il chantun Berna

L’emprim accident è capità il venderdi enturn las 16:30 datiers da la staziun da Lüscherz, a la riva dal Lai da Bienna. Plirs vaguns d’in tren da la societad Aare Seetal mobil èn ids sur ils binaris ora, e lura cupitgads da la vart. Trais persunas èn vegnidas blessadas, tranter quellas er il locomotivist.

Mo pauc pli tard è in tren da la societad Regionalverkehr Bern-Solothurn RBS ì sur ils binaris ora a Büren, circa 40 kilometers davent da Lüscherz. Tenor la Polizia chantunala bernaisa èn nov persunas creschidas e trais uffants vegnids blessads. Ina persuna ha grevas blessuras.

Ferms suffels d'orcan sajan stads la raschun

Per il mument supponan las autoritads che suffels d'orcan sajan stads la raschun dals dus accidents. Omaduas lingias da viafier sajan vinavant serradas. Tenor Meteonews ha ina staziun da mesirar betg lunsch davent nudà gist il temp da l’accident in suffel da 136 kilometers l’ura.

Il 1996 avevan ferms vents gia fatg cupitgar trens or dals binaris. E tenor il biro d'investigaziun da segirtad SUST ha in vent era fatg cupitgar in tren il 2007. Là eri ina cumposiziun da la viafier appenzellaisa pertutgada.

In di burascus en parts da la Svizra

En la Bassa ha il stemprà «Mathis» per part furià cun suffels d’orcan e laschà cupitgar plantas. Quai ha manà a problems sin vias, tar viafiers ed era sin il Lai da Constanza. Ad Egolzwil en il chantun Lucerna ed a Koppigen en il chantun Berna sajan vegnidas mesiradas spertezzas da vent da 130 kilometers l’ura. Quai ha communitgà MeteoSchweiz.

A Liestal en il chantun Basilea-Champagna saja ina construcziun da tetg vegnida suflada cunter ina fatschada d’ina chasa – sco la Polizia chantunala ha communitgà. Ina persuna saja vegnida blessada levamain. L’institut da naiv e lavinas a Tavau annunzia per il Vallais Sut in privel da lavinas grond, stgalim 4. En il rest da las Alps – uschia er en il Grischun – vala in privel da lavinas considerabel, stgalim 3.

RTR novitads 20:00

Artitgels legids il pli savens