Svilup e mesiras preventivas - Plirs collavuraturs dal Resort Bogn Ragaz en quarantina - Novitads

Plirs collavuraturs dal Resort Bad Ragaz èn en quarantina suenter ch'in giast è vegnì testà positiv sin il virus.
Ina studenta da scola tecnica spezialisada da Bienna era vegnida testada la sonda positiv sin il virus. 54 Persunas èn per consequenza en quarantina.
Fin la dumengia a las 17:00 èn vegnidas confermadas en Svizra 24 infecziuns.

Perquai ch'in giast dal Resort Bogn Ragaz è vegnì testà positiv sin il coronavirus èn tschintg collavuraturs vegnids dispensads per duas emnas. Il giast ch'è stà dals 22 fin ils 24 da favrer en il Resort, è vegnì testà positiv sin il coronavirus, in pèr dis pli tard en il chantun Turitg. Avant sia visita a Bogn Ragaz era il giast stà a Milaun.

Il Resort Bogn Ragaz è vegnì infurmà ils 28 da favrer ed ha lura reagì. Tut ils collavuraturs ch'èn stads pli che 15 minutas en contact cun il giast èn vegnids dispensads per duas emnas. I sa tractia d'ina mesira preventiva, scriva il Resort Bogn Ragaz. Er tut ils ulteriurs collavuraturs e giasts sajan vegnids infurmads davart las mesiras.

Duas classas da la scola tecnica da Bienna en quarantina

A Bienna èn duas classas da la scola tecnica spezialisada sco er lur scolasts en quarantina. Quai suenter ch'il chantun Berna aveva registrà la sonda ses emprim cas da corona, numnadamain ina giuvna che studegia a la scola tecnica. Pertutgads èn 45 students e studentas sco er 9 persunas d'instrucziun.

Sin basa dal profil da sa muventar da la studenta na pertutga la quarantina betg l'entira scola. Be ch'ella è stada sin l'areal da la scola na vegn dal medi chantunal betg considerà sco «stretg contact».

Sco la direcziun da sanadad dal chantun Berna ha communitgà, sajan ils pertutgads vegnids contactads ed instruids mintgin singul. Tuts hajan reagì cun chapientscha per la mesira preventiva.

Emprim cas confermà en il chantun Friburg

Il chantun Friburg ha registrà oz dumengia ses emprim cas da corona. In um da 30 onns or dal district da Greyerz è vegnì testà positiv. Quai ha communitgà la directura da sanadad dal chantun Anne-Claude Demierre.

L’um saja returnà l’emna passada da la Lumbardia. El sa chattia il mument en l’ospital chantunal a Friburg. Il svilup da la malsogna saja positiv. Nov persunas or dal conturn da l’um sajan en quarantina.