Swissmedic ha survegnì fin uss 862 annunzias d'effects secundars suenter ina vaccinaziun da corona. Quai correspunda ad in cas sin 1'000 dosas vaccinadas. 30% da quests cas valan sco gravants, communitgescha Swissmedic.
Il pli savens hai dà reacziuns sin il vaccin cun fevra, fadia da trair il flad, infecziuns, sturnizi e mal il chau. Intginas persunas hajan stuì vegnir tractads en l'ospital, il pli savens n'èn las persunas dentant betg stadas periclitadas. Mortoris pervia da la vaccinaziun n'hai betg dà.
Las persunas pertutgadas d'effects secundars eran en media 64 onns veglias.
Er Biontech e Pfizer vul far tests tar uffants
Las interpresas farmaceuticas Biontech e Pfizer han annunzià da laschar testar lur vaccin da corona tar uffants. Uffants tranter 6 mais ed 11 onns duain participar ad in studi. L’emna passada aveva gia Moderna communitgà da cumenzar cun tests tar uffants.
Enfin ussa na datti anc nagin vaccin, ch’è lubì per uffants pli pitschens. Cunquai ch’uffants survegnan furmas pli levas da Covid-19, n'è lur vaccinaziun enfin uss betg stada en il center.
