Siglir tar il cuntegn

Header

cuntegn

Telefonia Nova greva panna tar Swisscom

Dapi las 14:55 funcziunescha la rait da telefonia da la Swisscom puspè. Pertutgada da la panna è stada la telefonia mobila e da la rait fixa en l'entira Svizra. La raschun per il disturbi vegn anc sclerida.

En grondas parts da la Svizra hai dà quest mardi problems cun la rait da telefonia da la Swisscom. Tranter las 11:50 e las 14:55 haja dà disturbis en la telefonia mobila ed en la rait fixa da Swisscom, ha confermà l'interpresa. Entant stettian tut ils servetschs puspè a disposiziun. La raschun per ils disturbis stoppia anc vegnir sclerida.

Durant quel temp èn tenor las indicaziuns da la Swisscom èn discurs sur la rait mobila per clients privats e da fatschenta stads restrenschids. Ultra da quai haja dà disturbis en la rait mobila sco er en la rait fixà per telefonar sin numers da business (08xx). Ils numers d'urgenza na sajan dentant betg stads pertutgads da la panna.

Tenor la pagina d'internet «Alert Swiss» n'eri dentant en divers chantuns vers mezdi betg pussaivel da cuntanscher ils numers d'urgenza 112, 117, 118 e 144 cun il telefonin.

Gia quarta panna aifer curt temp

Igl è gia il quart incap en il decurs da quest onn. Sulettamain il schaner ed il favrer avevi dà trais interrupziuns entaifer paucas emnas. L’Uffizi federal da communicaziun aveva annunzià sin quai in’examinaziun dals fatgs e mess differentas mesiras en vista. Ils motivs per ils problems n'èn anc betg enconuschents.

audio
Per tadlar curt e cumpact
ord Novitads dals 26.05.2020. Maletg: RTR
laschar ir. Durada: 44 Secundas.

RTR novitads 14:00

Artitgels legids il pli savens