Il dumber d'uras da colonnas è ida enavos per in terz, scriva l'Uffizi federal per vias Astra. La rait da vias naziunalas è creschida l'onn passà per radund 400 kilometers. Tranter auter er pervi dal conclus nov NEB che ha procurà – che vias chantunalas èn vegnidas transferidas a la Confederaziun.
25,4 milliardas kilometers da vehichels èn vegnids ids l'onn passà sin la rait naziunala da vias. Senza las vias da NEB èn quai stadas 22,9 milliardas kilometers da vehichels. Quai èn 17,9% pli pauc che l'onn avant. Il pli marcant è il traffic sa reducì la primavaira dal 2020, durant l'emprima unda da la pandemia, scriva Astra. Durant la stad è il traffic lura puspè s'augmentà sin il nivel da l'onn avant. Durant la segunda unda hai lura er puspè dà ina reducziun dal traffic, dentant pli pauc ferma che durant la primavaira.
Er colonnas hai dà en undas
Las uras da colonnas per l'onn 2020 èn sa reducidas tenor l'Astra per radund in terz cumpareglià cun l'onn avant, numnadamain per 34,3%. Er qua saja il svilup ì en undas, sco tar il traffic.
Durant l'avrigl 2020 n'hai dà quasi naginas colonnas sin vias naziunalas. La stad èn cumparids ils musters sco ils auters onns, ed il settember hai dà dapli colonnas, malgrà corona. Fertant èn las uras da colonnas puspè crudadas sut il nivel disà il november.
Mesiras per meglierar il traffic
Per ils onns 2020 enfin 2024 ha l'Astra definì mesiras per ch'il traffic possia cular meglier. Vitiers tutgia l'armonisaziun dal tempo. Dapi il 1. da schaner èn obligatorics il principi da serranetga e da furmar ina giassa da salvament. Plinavant èsi lubì da charrar da vart dretga dad ina colonna sperasvi. Uschia possia il traffic cular meglier sin tut ils vials, è l'idea.
