Ils chantuns pretendan dal Cussegl federal engaschi per la cunvegna da basa cun l'UE. En ils discurs cun l'Uniun Europeica duai il Cussegl federal nizzegiar cumplainamain tuttas opziuns politicas avant ch'el prendia ina decisiun strategica, pretenda la Conferenza da las regenzas chantunalas KdK.
Emprim sclerir ils trais puncts
I saja indispensabel da sclerir ils trais puncts averts en il senn da la Svizra per pudair suttascriver la cunvegna instituziunala, uschia la KdK. Ils trais puncts èn subsidis, mesiras flancontas sco era la dumonda davart la directiva per burgais da l'UE.
Mantegnair ils interess da la Svizra
La KdK ha sco era il Cussegl federal constatà, che la posiziun da la Svizra e da l'UE è lunsch in ord l'auter. Ils chantuns sajan da l'avis, ch'il Cussegl federal duai interprender tut per evitar ina spirala negativa. Il Cussegl federal stoppia far tut per trair las dretgas decisiuns per pudair mantegnair ils interess da la Svizra.
