Ils chantuns Berna e Lucerna barattan ina part da lur dosas da vaccin cun ils chantuns Appenzell Dador, Glaruna, Sur- e Sutsilvania, Schaffusa, Soloturn, Tessin e Zug. Uschia saja pussibel en quests chantuns da dar la segunda virola a las persunas che hajan gia survegnì l'emprima, communitgescha la Conferenza dals directurs chantunals da sanadad.
La mesira saja necessaria perquai ch'intgins chantuns na pon uschiglio betg tegnair en lur plan da vaccinar pervi da las stretgas da furnir. Ils chantuns Berna e Lucerna survegnan pli tard dosas supplementaras. Vi dals quantums che mintga chantun survegn da la Confederaziun na sa midia nagut. Er betg vid il principi da reparter il vaccin teor il dumber da populaziun.
Campagna sin buna via
La campagna da virola en Svizra saja sin buna via, quai ha ditg Anne Lévy, la directura da l'Uffizi federal da sanadad. En tut ils chantuns marschia la campagna ruassaivel, professiunal e senza incap, uschia Lévy. Da las 550'000 dosas da vaccin sajan 518'000 repartidas als chantuns.
Il Grischun ha survegnì fin oz 12'900 dosas, da quellas èn duvradas 7'300. Sin 100 persunas han 3,69 survegnì ina dosa. Ensemen cun ulteriurs 16 chantuns è il Grischun uschia sur la media svizra ch'è sin 3,64 dosas sin 100 persunas.
