Venderdi ha gì lieu il di naziunal da cordoli en commemoraziun da las victimas da l'incendi a Crans-Montana (VS). En l'entir pajais hai dà ina minuta da silenzi ed in mument da commemoraziun a las 14:00 nua che ils zains da tuttas baselgias svizras han tutgà durant tschintg minutas.
Muments commovents en l'entira Svizra
-
Bild 1 von 3. A Losanna èn persunas sa radunadas davant la catedrala. Bildquelle: Keystone.
-
Bild 2 von 3. A Son Gagl è la glieud sa radunada sin la plazza da la claustra per la minuta da silenzi. Bildquelle: Keystone.
-
Bild 3 von 3. Ad Adelboden han collavuraturas e collavuraturs da la protecziun civila tegnì ina minuta da silenzi avant il slalom gigant da la cuppa mundiala da skis. Bildquelle: Keystone.
En differents lieus, en spezial en citads e scolas, han medemamain gì lieu festivitads commemorativas. Per la populaziun a Crans-Montana èsi vegnì organisà ina transmissiun da la ceremonia.
Plirs cussegliers federals han fatg il viadi en il Vallais
La ceremonia da commemoraziun ha gì lieu en lieu en il center da congress a Martigny.
A la ceremonia da commemoraziun èn sa participads trais cussegliers federals: il president da la Confederaziun Guy Parmelin, il minister da l'exteriur Ignazio Cassis, il minister da giustia Beat Jans ed il chancelier federal Viktor Rossi. Medemamain ha l'entir Cussegl da stadi dal chantun piglià part a la commemoraziun.
Stads preschents a Martigny èn represchentantas e represchentants dals auters stadis ch'han pers burgais u dals quals ch'igl ha dà persunas blessadas ed er dals pajais che han purschì lur agid. Il Departament federal d'affars exteriurs aveva envidà represchentants da 37 stadis e da l'Uniun europeica.
Er il president franzos Emmanuel Macron ed il president da l'Italia Sergio Mattarella èn stads a la ceremonia da commemoraziun a Martigny. Il Luxemburg è vegnì represchentà dal gronduca Henri, la Belgia da ses primminister Bart De Wever.