Il nov schef da la SBB ha num Vincent Ducrot. Il Friburgais da 57 onns è vegnì elegì sco successur d'Andreas Meyer che sa retira l'auter onn. Quai han confermà trais funtaunas independentas envers l'agentura da novitads Keystone-SDA.
Ducrot enconuscha gia la SBB
Ducrot timunescha dapi il 2011 las interpresas da transport friburgaisas TPF. Avant quai ha el gia gì funcziuns da manar tar il traffic da persunas da la SBB. Uschia è el stà davent dal 1999 schef dal sectur traffic a lunga distanza e cunquai stà participà a la pli gronda cumpra da trens en l'istorgia da las Viafiers federalas: Ils trens cun vaguns a dus plauns da Bombardier ch'èn daventads enconuschents co trens da pannas.
Dal 1997 fin al 1999 è Ducrot er stà delegà da la SBB per la Expo.02. En quella funcziun ha el realisà il concept da traffic cun radund 1'700 trens spezials ch'han manà ensemen cun ils trens regulars radund 3,5 milliuns visitaders e visitadras da l'Expo en la regiun.
Cussegl d'administraziun è cuntent
Il cussegl d'administraziun è persvas ch'el ha chattà cun Vincent Ducrot la dretga schliaziun ed ina persunalitad persvadenta per la SBB. Quai ha ditg la presidenta dal cussegl d'administraziun, Monika Ribar, il mardi a Berna davant las medias. Tranter auter pervi da sias experientschas sur onns tar las interpresas da transport da Friburg e tar las Viafiers federalas haja il nov CEO las qualificaziuns ch'i dovria per quest post.
Reacziuns positivas
Las reacziuns sin l'elecziun da Vincent Ducrot sco nov CEO da las Viafiers federalas èn dal tuttafatg positivas. La ministra dal traffic, Simonetta Sommaruga, ha ditg ch'ins haja elegì cun il Friburgais ina persuna ch'enconuschia fitg bain il sectur da viafier en Svizra. Ed ella ha dà vinavant a Ducrot che las clientas ed ils clients spetgian che la SBB saja segira, punctuala e funcziuneschia a moda fidabla.
Er il sindicat dal persunal dal traffic SEV vesa Ducrot sco ina buna elecziun. El enconuschia il service public e saja conscient da la muntada da la SBB. Ducrot stoppia uss purtar ruaus en l'interpresa.
RTR novitads 11:30
