Indigens duain vegnir preferids pli fitg en interpresas svizras. Da quest avis è la cussegliera naziunala da la PPS e scheffa da la EMS-Chemie, Magdalena Martullo-Blocher. En blers concerns svizzers sajan ozendi esters a la testa che na chapeschian betg il sistem da la Svizra e che na giajan betg a votar – uschia Martullo-Blocher en in’intervista cun las gasettas da Tamedia.
La PPS na saja betg categoric cunter quai, che esters vegnian en Svizra. Il problem saja dentant che blers dals immigrants supprimian ils indigens sin il martgà da lavur. Cun la pandemia da corona vegnia la situaziun anc pli precara. Pertutgads sajan surtut giuvens e pli vegls che hajan uss grev da chattar ina plazza da lavur.
Il suveran svizzer decida ils 27 da settember davart l’iniziativa da limitaziun. Quasi tut las partidas e federaziuns d’economia refuseschan l’iniziativa da la PPS.