Davart quels che dorman en baselgia

Sto esser ch'ils Sentiners durmivan gugent durant il servetsch divin. Per cumbatter quest malfatg ha lur reverenda Conradin Riola scrit il 1709 in cudesch da prest 200 paginas.

Conradin Riola sto esser stà in reverenda engaschà. Mo ch'el aveva in problem: adina puspè sa cupidavan ils da Sent durant il servetsch divin. Els faschevan in cupid empè da tadlar il pled da Dieu – ed il predi da lur reverenda. Per il signur reverenda ina chaussa nunditga. E cunquai che sias admoniziuns a bucca n'han betg dasdà ils cartents, ha el decis da scriver in cudesch cun il titel: «TROMMETA SPIRITUALA Per excitar tots dormenzats pecchiaders, in special quels chi dormen in baselgia & chiasa da Deis.»
Sin prest 200 paginas scriva il reverenda en sia «Trumbetta spirituala» dal putgà da durmir en baselgia e da la natira da la sien. Però, sco che l'istoricher Jon Matthieu ha constatà prest 300 onns pli tard, n'aveva Conradin Riola betg survegnì il grond applaus per ses cudeschet.