Il 2023 ha la Confederaziun lantschà la vignetta electronica per duvrar las autostradas svizras. Dapi l'avust è quella gia disponibla. Cun la midada da l'onn vegna quai uss er in tema per tut ils automobilists che dovran ina nova vignetta per il 2024. E gea, era la vignetta tradiziunala da tatgar datti anc adina, tar quella na sa mida nagut. Ma la versiun electronica porscha avantatgs.
Tge avantatgs porscha la vignetta electronica?
La e-vignetta è liada vi dal numer da l'auto e betg pli vi dal vehichel. Quai porscha plirs avantatgs.
- Sch'ins cumpra in nov auto e salva il numer na dovri betg ina nova vignetta.
- Sch'ins ha in numer da stgamiar (Wechselnummer) basta ina vignetta electronica per plirs autos.
- Ins po midar il numer e surpigliar la vignetta sch'ins – per exempel – mida chantun.
- Sgarar giu la veglia e tatgar la nova vignetta scroda.
Nua pos jau cumprar la e-vignetta?
La vignetta datti directamain tar la Confederaziun sin la pagina d'internet, in link sa chatta a la fin da quest artitgel. Quai è la suletta uffiziala funtauna per quella vignetta electronica. Sche autras paginas u reclamas sin il telefonin porschan la vignetta èsi dad esser precaut: Per ordinari èn quellas purschidas pli charas – ed i po dar cugliunarias.
Pajar pon ins cun carta (Visa, Master, American Express, PostFinance), via online-banking da la PostFinance, cun TWINT u cun Google Pay. Sco che SRF scriva, duai er dar la pussaivladad da pajar cun quint.
Stos jau ma registrar ed inditgar datas?
La e-vignetta pon ins cumprar anonim. Il sulet necessari è il numer da l'auto. Ins po dentant era inditgar ina adressa dad e-mail per retschaiver la quitanza u sa registrar sin il portal cun il num. Lura han ins era pli tard access a la cumpra e po far pitschnas adattaziuns.
