Quatter sconfittas che fan mal – quatter sconfittas durant las davosas quatter partidas da la qualificaziun. Uschia na vuleva il HCD betg sa preparar sin la fasa decisiva dal campiunadi, sin ils playoffs. Enstagl dad ir curt avant ils playoffs per in bun sentiment cunter ils adversaris Lugano, Ambri, ils ZSC Lions e Kloten, sto Tavau l’emprim analisar questas sconfittas ed alura cumenzar cun la preparaziun sin ils playoffs. Cunter l’adversari da l’emprima runda da playoff, cunter ils ZSC Lions ha il HCD bain giugà ferm. La fin finala dentant tuttina pers.
Seria da quart final cunter ils ZSC Lions
Sch'ins prenda las quatter partidas ch'il Club da hockey da Tavau ha dà questa stagiun en la qualificaziun cunter ils ZSC Lions, alura n'è la perspectiva betg uschè buna. Il HCD ha pers tuttas quatter partidas encunter l’equipa turitgaisa. Er la davosa, ils 2 da mars cun 1:4. En il quartfinal ha il HCD uschia la schanza sin ina revantscha.
Playoffs cumenzan tar null
Il bun vi da la fasa da k.o. è il fatg che quella cumenza adina tar null. Il HCD sto emblidar tut quai ch'è stà durant la qualificaziun, er quellas quatter sconfittas cunter ils ZSC Lions e cumenzar da nov. Sche quai grategia, alura è bler pussaivel. La stagiun passada è il HCD avanzà fin en il mezfinal ed ha lura pers la seria cunter il futur campiun EV Zug.
