Podest cursa singula 10 km stil liber
- 1. Therese Johaug (NOR) 23:09.8
- 2. Frida Karlsson (SWE) + 54.2
- 3. Ebba Andersson (SWE) + 1:06.9
La fin schaner a Falun en Svezia eri anc reussì a l’Americana Jessie Diggins da batter la gronda dominatura en questa disciplina. Al punct culminant da la stagiun ha Therese Johaug però ina giaa dapli suttastritgà sia classa. Igl è stà ina demonstraziun da la Norvegiaisa che gudogna uschia sia 17avla medaglia a campiunadis mundials, per la 12avla giada ina dad aur.
Ina classa per sa sezza
Gia tar l’emprim temp intermediar suenter 1,5 kilometers era Therese Johaug gia a la testa. Sulet la Svedaisa Frida Karlsson ha anc pudì siemiar dal titel durant ils emprims kilometers. La finala n’ha dentant era Karlsson gì nagina schanza. La finala ha la Svedaisa pers bunamain ina minuta sin Johaug ch’aveva gia gudagnà la fin d’emna la cursa dal skiatlon. Per Karlsson ch’ha pir 21 onns èsi gia la quarta medaglia a campiunadis mundials. La medaglia da bronz gudogna sia cumpatriota Ebba Andersson ch’ha pers passa ina minuta sin Johaug. Stuì sa cuntentar cun il quart plaz ha l’Americana Jessie Diggins che maina il classament general da la cuppa mundiala. Atletas svizra n’èn naginas stadas a la partenza.
