Il duo Laurien van der Graff da Tavau e Nadine Fähndrich da Lucerna èn idas sco cunfavuritas a la partenza da la cursa dal sprint d’equipa. Durant questa stagiun aveva il duo gia fatg quatter giadas il pass sin il podest dad in sprint d’equipa da la cuppa mundiala. A Dresden en Germania aveva il duo svizzer perfin gudagnà la cursa.
Mo las Svedaisas anc pli spertas
Cun la motivaziun da savair sco igl è da gudagnar il sprint d’equipa èn Laurien van der Graaff e Nadine Fähndrich idas a la partenza da la cursa dad oz. E las svizras han cumbattì da la bell'entschatta per las medaglias. Sin l’ultima runda ha Nadine Fähndrich lura fatg tut cler. Ella era adina davanttiers da la partida. Ed era sin l'ultima ascensiun era en la cumpetitiva cun la svedaisa. In mument ha la svizra perfin savì siemiar da la medaglia dad aur. Las svedaisas eran dentant anc in zichel pli fermas.
Emprima medaglia svizra tar las dunnas dapi l’onn 1987
Divers onns ha l’equipa da passlung da las dunnas svizras stuì spetgar sin ina medaglia tar campiunadis mundials. La davosa giada aveva Evi Kratzer gudagnà l’onn 1987 la medaglia da bronz era tar ils campiunadis mundials ad Oberstdorf. Dapi lura n'aveva nagina dunna svizra pli fatg il pass sin il podest tar campiunadis mundials. Al duo Laurien van der Graaff e Nadine Fähndrich è quai uss grategià.
Nagina schanza per ils umens svizzers
Entant che l’equipa svizra da las dunnas ha savì festivar oz il pli grond success dapi passa trenta onns n’ha l’equipa dals umens cun Jovian Hediger e Roman Furger betg savì cumbatter per ina medaglia. La squadra svizra è vegnida novavla. Il titel da campiuns mundials va a la squadra Norvegiaisa, argient gudogna la Finlanda e bronz la Russia.
