Per Simona Waltert da Cuira è l’Australian Open a Melbourne a fin suenter l’emprima runda. Ella n’ha gì nagina schanza cunter l’Americana Amanda Anisimova – ed ha pers cunter il numer 4 dal mund en dus sets cun 3:6 e 2:6. La partida ha cuzzà in’ura. «Igl è stà impressiunant da sentir il tempo e la forza dad ella sin la plazza», ha Waltert ditg suenter il gieu. Gieus encunter talas giugadras na tutgan numnadamain betg tar il mintgadi da la giugadra da 25 onns. Per la Grischuna èsi stà la terza giada ch'ella ha pudì dar in Grand Slam tar l'elita, suenter ch'ella ha il 2023 gia dà il French Open (segunda runda) e Wimbledon (emprima runda).
«Exact per quests turniers dattan ins tennis». Ed i sajan er ils lieus nua ch'ins possia dar encunter las meglras giugadras dal mund. Ella dovria simplamain anc dapli experientscha encunter las topgiugadras, manegia Simona Waltert.
Simona Waltert: «Sentir la gnervusadad avant in tal event è bel»
L'onn passà ha Simona Waltert dumagnà da far il pass en l'elita mundiala. Ella ha gudagnà per l'emprima giada in turnier da la seria da «WTA Challenger» e tutga, era grazia a questa victoria, dapi plirs mais tar las top 100 giugadras da tennis. Actualmain è ella numer 86 dal mund ed uschia è ella era qualifitgada directamain per l'emprim Grand Slam da l'onn – l'Australian Open a Melbourne.
Per la giugadra da Cuira èsi stà ina premiera. Anc mai ha ella pudì dar l'Australian Open tar l'elita. Ed insumma èsi stà per Simona Waltert l'emprim Grand Slam dapi il 2023.
Mais intensivs e temp per realisar
Per la giugadra da Cuira èsi stà mais intensivs cun blers success. Ch'ella haja fatg il pass en ils top 100 haja ella pir realisà las ultimas emnas. Ella saja era loscha da la situaziun actuala. Dumagnar en ils top 100 saja adina stà ina gronda finamira e ch'ella saja uss direct qualifitgada per l'Australian Open saja tant pli bel.
Dapi la fin december è Simona Waltert stada en l'Australia per sa preparar sin l'emprim punct culminant da l'onn. Tranter auter ha ella dà in turnier da «WTA Challenger» a Canberra, nua ch'ella ha fatg il pass en il quartfinal. Il focus è dentant adina stà sin l'Australian Open.
L'Australian Open: L'emprim Grand Slam da l'onn
Il Melbourne Park è in dals pli impurtants cumplexs sportivs da l’Australia. L’areal cumpiglia quatter gronds stadis da tennis: la Rod Laver Arena cun radund 15’000 plazzas da seser, la John Cain Arena (10’000), la Margaret Court Arena (7’500) e la Show Court Arena (5’000). En tut stattan a disposiziun 24 plazzas per il turnier
L'Australian Open è il sulet Grand Slam cun trais stadions cun tetg serrabel. Quai permetta da giugar partidas senza interrupziun, er sch'i plova u tar gronda chalira.