Vladimir Petkovic n'è betg pli trenader da Bordeaux. L'anteriur trenader da la naziunala svizra da ballape è vegnì relaschà in di suenter la terrada da 0:5 a Reims. Petkovic aveva surpiglià ils Girondins de Bordeaux la stad passada.
Suenter la stad avevi dà grondas midadas entaifer il cader da l'equipa. Petkovic n'ha dentant betg dumagnà ses club ord la zona da relegaziun. Actualmain sa chatta Bordeaux sin la penultima plazza. Il contract da Petkovic fiss anc stà valaivel fin la fin dal 2024. Tenor la gasetta da sport l'Equipe aveva el ina paja da 280'000 euros per mais tar il club franzos. Ensemen cun l'anteriur trenader da la naziunala svizra ha er ses assistent Antonio Manicone stuì bandunar Bordeaux.
