Il sulet ch’ha pudì star sin ils chaltgogns al favurit Thomas Pidcock è stà Mathias Flückiger. Pir tar la davosa ascensiun ha il Bernais stuì laschar scappar il Brit. La finala ha Flückiger cuntanschì l’arrivada sco segund cun in retard dad otg secundas.
Ina buna prestaziun ha er Vital Albin mussà. El ch’abitescha sco er Nino Schurter a Cuira è vegnì 6avel ed ha uschia pers be quatter secundas sin il terz plaz da Schurter.
In spectacul da mountainbike
Cuira è stà per ina fin d’emna il Mekka dal sport da mountainbike. Las cursas da la Bike Revolution, ina seria da cursas che tranter auter Nino Schurter ha gidà ad inizià avant in onn, èn stadas in success cumplain. Quest «city event» ha carmalà a la partenza ils megliers mountainbikers dal mund sco er fullas da glieud a l’ur da la cursa ch’ha manà ina gronda part tras las streglias e giassas da la citad veglia da Cuira.
En in’emna spetgan las emprimas cursas da la cuppa mundiala en questa stagiun a Nove Mesto en Tschechia. En in mais stattan sin il program las cursas da la cuppa mundiala a Lai.
Evie Richards ina classa per sa sezza
La campiunessa mundiala dal 2021 da la Gronda Bretagna ha triumfà en la cursa da las dunnas d’elita, quai a moda suverana. Richards ha declassà l'entira concurrenza per bunamain duas minutas.
Gudagnà il sprint final per il segund plaz ha l’actuala campiunessa mundiala, la Franzosa Pauline Ferrand-Prévot piz a cup avant la meglra svizra, Sina Frei. Manchentà in plaz sut las top trais ha l'actuala numer 1 dal mund, Alessandra Keller che veva triumfà avant in onn a la cursa da la Bike Revolution a Cuira. Cun Jolanda Neff sco 7avla e Nicole Koller sco 10avla èn anc duas ulteriuras svizras classadas sut las top 10.
Ginia Caluori la pli ferma sut 23 onns
Ina grondiusa prestaziun ha sia cursa da chasa ha mussà Ginia Caluori da Panaduz. La giuvna da 20 onns ch’ha midà pir avant bun trais onns dal ski alpin sin il mountainbike ha ina giada dapli demonstrà ses grond talent avant ils fans da chasa. Caluori è vegnida 13avla en la cursa da las dunnas d’elita cun in retard da 5:38 minutas sin la victura Evie Richards ed è uschia stada la pli sperta en la categoria da las dunnas U23, quai cun in avantatg da passa duas minutas sin Noëlle Buri, la segunda mountainbikera U23.
Victoria dubla per las junioras indigenas
Anina Hutter da Trimmis avant Chiara Solèr da Lumbrein. Las duas mattaduras localas han festivà ina victoria dubla a la cursa da chasa en il rom da la Bike Revolution a Cuira.
Anina Hutter ha gudagnà la cursa da las junioras U19 en 1:10:51 ura ed uschia battì Chiara Solèr per 47 secundas. Cumplettà il podest sco terza ha Fiona Schibler dal chantun Soloturn.
Australians procuran per la musica tar ils juniors
Il mountainbiker da la naziunala australiana Jack Ward ha gudagnà la cursa dals juniors U19 avant ses cumpatriot Harry Doye. Cumplettà il podest sco terz ha Nicolas Halter da l’Appenzell Dadora. Persvadì ha er Mauro Hassler da Cuira. Tar sia cursa quasi avant l’isch-chasa è il giuven da 17 onns vegnì 5avel cun in retard da 42 secundas.
PREVISTA: Cuira beneventa l’elita mundiala
Da Schurter fin a Pidcock. In’emna avant l’emprima cursa da la cuppa mundiala da mountainbike en questa stagiun sa mesiran ils megliers mountainbikers dal mund en la chapitala grischuna, quai en il rom da las cursas da Bike Revolution.
La nova seria da cursas da Bike Revolution è vegnida lantschada avant in onn. Tranter auter è er Nino Schurter stà in dals iniziants. Quest onn stattan tschintg cursas sin il program, tranter auter a Cuira ch’ha gì sia premiera l’onn passà. La visiun dals organisaturs ed iniziants da Bike Revolution è da revoluziunar il sport da mountainbike en Svizra. Cun questas cursas vulan ins promover profis e talents sco er mountainbikers da hobi e famiglias ch'èn fascinads da quest sport. Cun la cursa a Cuira vegn il sport da mountainbike per ina giada er tar la glieud. La cursa che passa tranter auter er tras las giassas da la citad veglia vala uschia sco in «city event».
Da Schurter fin a Pidcock
Quest onn carmala la cursa da Bike Revolution quasi l’entira elita mundiala a Cuira. A la partenza partan dasper ils megliers svizzers sco Nino Schurter, Mathias Flückiger, Vital Albin, Jolanda Neff u Alessandra Keller er la crème de la crème internaziunala. Uschia va la dumengia a la partenza er l’actual campiun olimpic da Tokyo, il Brit Thomas Pidcock sco er il Rumen Vlad Dascalu, l’American Christopher Blevins ed ils Franzos Titouan Carod, Victor Koretzky e Jordan Sarrou ch’ha triumfà l’onn passà Cuira.
Il spectacul spetga la dumengia
La sonda, ils 6 da matg stattan sin il program las cursas dals giuvenils e juniors ed ils mountainbikers d’elita van la dumengia, ils 7 da matg, a la partenza. Las dunnas d’elita partan a las 12:00 uras ed ils umens d’elita a las 14:15 uras.
