Siglir tar il cuntegn

Header

cuntegn

Bike Revolution Vital Albin segund davos Flückiger

Il mountainbiker lumnezian ha persvadì en l’emprima cursa da la seria da cursas da Bike Revolution 2023. Al Monte Tamaro en il Tessin è Vital Albin vegnì segund davos ses collega d’equipa Mathias Flückiger ch’ha pir dacurt dà ses comeback suenter sia affera da doping.

Vital Albin ha la finala pers 2:08 minutas sin il Bernais Mathias Flückiger ch’ha uschia demonstrà ch’el è pront per sia uschè numnada segunda carriera. Cumplettà il podest sco terz ha cun Luca Schätti in ulteriur Svizzer.

Tar las dunnas d’elita ha la Taliana Martina Berta evità ina festa svizra. Ella ha gudagnà avant Nicole Koller e Ronja Blöchlinger. Betg sin il podest èn stadas Sina Frei sco quarta ed Alessandra Keller sco 5avla.

En la categoria da las junioras sut 19 onns han duas Grischunas persvadì. Anina Hutter da Trimmis è vegnida davos la Taliana Valentina Corvi segunda e Chiara Solèr da Lumbrein è vegnida 5avla.

Las proximas cursas da Bike Revolution datti dals 5-7 da matg a Cuira. Tut en tut stattan quest onn sin il program tschintg cursas, tranter auter era dals 7-9 da fanadur a Tavau.

Or da l'archiv

audio
Vital Albin è pront per la nova stagiun da mountainbike
ord Actualitad dals 17.03.2023. Maletg: RTR
laschar ir. Durada: 2 minutas 51 Secundas.

RTR novitads 17:00

Artitgels legids il pli savens