L'entira Svizra è loscha sin la prestaziun da la naziunala svizra da ballape. Giugar il meglier campiunadi mundial da l'istorgia, questa finamira è vegnida ademplida. E tuttina, stgars 30 uras suenter è la Svizra vegnida eliminada da l'Argentina.
Vuschs criticas ed ina pulita cuntraversa datti enturn il VAR. Blers expertas ed experts da ballape dian che quest assistent da video haja decidì il duel Svizra-Argentina. Concret vai per la finta da Breel Embolo, che rocla senza che l'adversari haja tutgà el. L'Argentin survegn mellen ed il VAR cumonda a l'arbiter da guardar l'entira scena. La carta melna da l'Argentin vegn annullada e per Embolo e sia finta datti mellen, ed en ses cas mellen cotschen. Embolo vegn bandischà da la plazza. Andreas Wieland, noss redactur da sport metta a lieu quellas scenas da quest ominus VAR.
Scenas dispitaivlas hai dà numerusas durant quest campiunadi mundial. Ma il VAR duess en sasez far tut pli fair. Quai n'è dentant betg adina uschia?
Andreas Wieland: Pli gist è quai franc vegnì, gols cun ils mauns sco quest ominus gol da Maradona dal 1986 na vegni betg pli a dar. Il grond problem è dentant ch'il VAR è, tenor mai, betg consequent. I manca ina clera lingia – e quai è fitg dispitaivel. Per part s'annunzia il VAR e per part betg. Uschia vegn en in gieu controllà quasi mintga acziun, en in auter gieu pauc u nagut. E quai n'è betg gist e procura per discussiuns e dischurden. E sch'ins n'è betg consequent pon ins influenzar in tal turnier sco ussa il campiunadi mundial.
Il esser consequent quei che fa pia mal il venter.. en sasez fissi direct da consultar il VAR sch'ina acziun n'è betg clera.
Per avair in gieu fair, gist e senza sbagls – gea. Ma quai n'è betg il senn u la finamira, perquai che lura vegniss il gieu interrut uschè savens ch'i na faschess probablamain betg grond plascher da guardar ballape. E quai che giess extrem a perder fissan tuttas emoziuns, ed il sport, e cunzunt il ballape, viva da las emoziuns. E dal reminent, quai è stà in giavisch u schizunt vegnì appellà avant quest campiunadi mundial da ballape, ch'il VAR stoppia mo s'annunziar tar scenas ed acziuns propi dispitaivlas e ch'il VAR na stoppia betg influenzar il gieu, in appell da Pierluigi Collina, oz schef dals arbiters da la FIFA.
Blers èn da l'opiniun ch'il VAR haja decis il gieu tranter la Svizra e l'Argentina – quai cun clamar l'arbiter avant la televisiun. Sinaquai hai dà mellen, meglier ditg cotschen per Breel Embolo. Las schanzas da la Svizra èn pia vegnidas massiv pli pitschnas cun in pli pauc sin il plaz. È quai uss stà correct da dar ad Embolo la carta u betg?
Qua van las opiniuns propi in ord l'auter. Il fatg è dentant, che Breel Embolo ha fatg ina schwalba, ed ha uschia provocà ina carta melna cunter l'Argentina, e quai è cugliunà. El n'è betg sa cumportà correct en quest'acziun, sch'ins guarda co ch'el rocla cun far cupitgarolas e tegna la chomma sco sch'el avess propi survegnì ina frida. Quai è stà ina tuppadad dad Embolo, cunzunt en questa situaziun, curt suenter il 1:1 cura che la Svizra era propi vi da dominar il gieu. El fa quai en in lieu absolutamain betg relevant, lunsch davent dal gol, e lura anc cun savair ch'el ha gia mellen – betg chapibel. E che l'arbiter mida la carta e dat quella, suenter avair vis ils maletgs a la televisiun, ad Embolo enstagl a l'Argentin è logic e pli che correct.
A quest campiunadi mundial datti la regla che l'arbiter dastga far quai. Ma deplorablamain influenzescha e decida el forsa schizunt il gieu cun spedir Embolo giu dal plaz. Nua che jau na sun dentant betg d'accord è ch'il VAR s'annunzia en quest mument, quai n'è betg consequent. Il VAR è mo s'annunzià perquai che l'arbiter aveva dà mellen per sbagl. Sch'el avess simplamain be tschivlà foul, fiss quai stà in sbagl e nagin n'avess tratg flad.
Cun auters pleds, igl è stà ina situaziun fitg malengraziaivla per tuts, ina situaziun che ha deplorablamain influenzà il gieu a disfavur dals Svizzers.
Quest campiunadi mundial è en il fratemp arrivads en sia fasa finala – quatter equipas cumbattan anc per il titel dals megliers. Ed il VAR – sche nus guardain sur quest campiunadi mundial ora – gea u na en l'avegnir?
Per mai èsi bun ch'i dat il VAR, dentant duai quel vegnir duvrà mo en situaziuns avant il gol u situaziuns nua ch'i decida gol u betg. Ma lura stuess quai ir in pau pli svelt. I na po betg esser ch'il gieu vegn magari interrut entiras minutas, perquai ch'il VAR sto guardar x giadas sin quest visur e lura clamar l'arbiter giu da la plazza che dura anc ina giada in'eternitad. Quai prenda davent las emoziuns e fraina extrem il gieu. Ma sco ditg, esser consequent u laschar star. Dentant na duai era betg mintga scena vegnir consultada dal VAR, ed uschiglio buna notg. En mintga cas ha quest Video Assistant Referee anc potenzial da vegnir meglier. Pertge i na dastg simplamain betg esser ch'i vegn discutà suenter in gieu u in turnier dapli da decisiuns da l'arbiter che dal gieu sez.
