Il biatlet svizzer Niklas Hartweg ha manchentà be per pauc ina rangaziun tranter ils megliers 10 al campiunadi mundial da biatlon a Nove Mesto en Tschechia. En la cursa singula sur 20 kilometers è el vegnì 11avel. Hartweg ha fatg be in sbagl da sajettar. En la loipa ha el però pers bler temp sin ils megliers. Sin il victur da la cursa, il Norvegiais Johannes Thingnes Bö, ha Hartweg pers passa quatter minutas. E tuttina, in pitschen confiert resta. Sco 11avel ha el mussà la megliera prestaziun da la squadra svizra fin qua al campiunadi mundial en Tschechia.
Segund meglier Svizzer è vegnì Sebastian Stalder sco 28avel. El ha fatg dus sbagls da sajettar.
La famiglia Bö percunter ha pudì festivar gist dubel oz. Sin plazza dus suenter Johannes Thingnes Bö è vegnì ses frar Tarjei Bö. La medaglia d'argient ha gudagnà il Tudestg Benedikt Doll.
