Suenter argient il 2022 en il short track sco er en la cursa roiala da cross-country gudogna Vital Albin sia proxima medaglia tar l’elita a campiunadis svizzers. A Crans-Montana en il Vallais è il Lumnezian vegnì terz. Sin il victur e collega d’equipa Mathias Flückiger ha Albin pers 3:06 minutas. Ursin Spescha da Sevgein ha terminà la cursa sco 14avel.
Mathias Flückiger ina classa per sasez
Betg stà da franar è Mathias Flückiger. Il Bernais ha pudì sa distanziar da la concurrenza gia en l’emprima dad otg rundas e la finala gudagnà suveran ses terz titel da campiun svizzer en seria, il quart en sia carriera. Flückiger ha triumfà cun in avantatg da 2:34 minutas sin ses collega d’equipa Lars Forster.
Betg stà a la partenza è Nino Schurter che metta ses focus sin las cursas da la cuppa mundiala en in’emna a Lai. Schurter è stà tranter il 2010 ed il 2020 gist nov giadas campiun svizzer da mountainbike.
Alessandra Keller defenda ses titel
Er tar las dunnas ha la defensura dal titel triumfà. Alessandra Keller ch’era vegnida avant in onn per l’emprima giada campiunessa svizra e ch’ha er gudagnà a Crans-Montana la cursa da short track ha gudagnà avant Jolanda Neff ch’era vegnida tranter il 2014 ed il 2021 gist set giadas campiunessa svizra da mountainbike en la disciplina cross-country. Cumplettà il podest sco terza ha Linda Indergand. Betg stada a la partenza è tranter auter Sina Frei.
Ginia Caluori gudogna argient
En la cursa da las dunnas U23 è Ginia Caluori da Panaduz vegnida secunda. Sin la victura Ronja Blöchlinger ha la Grischuna pers be 25 secundas. Campiun svizzer tar ils umens U23 è vegnì Dario Lillo. Janis Baumann dad Igis è vegnì quart ed ha manchentà il podest per be nov secundas.
Duas medaglias per las junioras grischunas
Fatg furora han las mountainbikeras grischunas en la categoria da la junioras. Anina Hutter da Trimmis ch’era vegnida onurada il venderdi saira sco «newcomerin» grischuna da l’onn 2023 ha gudagnà a moda suverana il titel da campiunessa svizra. Ella ha laschà davos ella Jana Glaus per 39 secundas. Gudagnà la medaglia da bronz sco terza ha Chiara Solèr da Lumbrein. Sin Anina Hutter ha la giuvna Lumneziana da 18 onns pers 1:19 minutas.
