Gia per la tschintgavla giada en seria è la Svizra la meglra naziun da skis dal mund. L’equipa enturn il victur da la cuppa mundiala generala, Marco Odermatt, ha puspè furnì ina stagiun stupenta. Era sche skiunzas e skiunz svizzers n'han betg pli gudagnà tantas cursas sco anc la stagiun passada, è la bilantscha impressiunanta. Skiunzas e skiunz svizzers han gudagnà 17 cursas da la cuppa mundiala e realisà 50 plazzas da podest. Vitiers vegnan 9 medaglias tar ils gieus olimpics a Milano-Cortina.
Equipa dals umens extraordinaria
La basa per quest success ha l’equipa svizra segir mess en las disciplinas spertas. En la cursa a val ed en il super-G èn ils skiunz svizzers ina pussanza. Gist otg cursas han els gudagnà. Quatter perfin cun dus skiunzs svizzers sisum il podest. Era la disciplina da basa, il slalom gigant, è en mauns svizzers. En questa disciplina han els gudagnà tschintg cursas.
Las dunnas n'èn betg uschè fermas
Tar las skiunzas svizras n'è la dominanza betg uschè frappanta. Ellas han pudì gudagnar quatter cursas. Quai è bainquant main ch'ils umens. Las bleras victorias ha Camille Rast pudì realisar - quai en disciplinas tecnicas. Sper ella han anc Corinne Suter e Malorie Blanc gudagnà adina ina cursa a val.
Il cader da las dunnas n'è betg uschè lartg sco quel dals umens. Ed uschia n'èn er betg las victorias uschè numerusas. Tar las dunnas sent’ins bain ch'i manca, sche Lara Gut-Behrami u Michelle Gisin n'èn betg da la partida. Ellas èn sa belssadas durant la stagiun. Era Corinne Suter n'era tras blessura betg betg propi en sia furma usitada.
Bilantscha positiva e bunas vistas per la proxima
Suenter la stagiun è avant la nova stagiun. Quella cumenza tradiziunalmain l'october cun las cursas sin il glatscher sur Sölden. Durant la stagiun 2026/2027 spetga lura puspè ina ivetta. Il favrer da l’onn proxim èn ils campiunadis mundials a Crans-Montana. Exact 40 onns suenter ils campiunadis mundials istorics l’onn 1987 è il circus da skis enavos en il chantun Valais.
Quai è stà la stagiun 2025/26
Themen in diesem Newsticker
- Mikaela Shiffrin e Marco Odermatt ils megliers da questa stagiun
- Haugan gudogna slalom – la culla pitschna va a McGrath
- Scheib cun culla per slalom gigant – Shiffrin cun culla gronda
- Slalom: Meillard maina suenter l'emprim percurs
- Aicher cun bunas schanzas sin la culla gronda
- Shiffrin resta la dominatura dal slalom – Holdener segunda
- Meillard cumbatta era per culla pitschna – Braathen dominescha
- Davos cumbats per cullas
- Paris repeta victoria – Monney manchenta stgars il podest
- Goggia gudogna e va per culla pitschna – Suter sin rang 2
L'entschatta da la stagiun 2025/26
Dapi blers onns resuna il tun da partenza per la nova stagiun da skis a Sölden, sin il glatscher da «Rettenbach». Ils skiunz e las skiunzas svizras han bunas regurdientschas vi da las cursas a Sölden. Tar las dunnas tegna Lara Gut-Behrami, ensemen cun Tina Maze, il record da trais victorias. Tar ils umens ha Marco Odermatt gudagnà, a l’entschatta da la nova stagiun, gia duas giadas a Sölden.
Vanessa Kasper turna cun nov schlantsch
In return ad in lieu enconuschent è la partenza en la nova stagiun da skis a Sölden era per Vanessa Kasper. L’onn 2021 è ella stada per l’emprima e davosa giada a la partenza dal slalom gigant da Sölden – lura dentant senza ch’ella avess pudì far il pass en la segunda cursa.
Per la skiunza da Schlarigna è la partenza da quest onn ina nova partenza suenter ch’ella n'era betg pli part d'in cader da Swiss Ski. La stagiun passada ha ella stuì s'organisar sezza. Malgrà questas circumstanzas difficilas ha Vanessa Kasper mussà, tut senza cader, ina da sias meglras stagiuns da skis. En la cuppa d’Europa è ella ida trais giadas sin il podest. Grazia a questas bunas prestaziuns ha ella puspè pudì turnar en il cader B da Swiss Ski ed è sa qualifitgada per tut las 10 cursas da slalom gigant da la nova stagiun.
Thomas Tumler suenter la meglra stagiun insumma anc ina meglra
Cun la vegliadetgna madira da 35 onns ha Thomas Tumler da Samignun mussà sias meglras prestaziun. A Beaver Creek, en ils Stadis Unids, ha el gudagnà la stagiun passada sia emprima cursa da la cuppa mundiala. Il favrer è el lura daventà vice champiun mundial dal slalom gigant a Saalbach Hinterglemm. Suenter ina buna stad vul il skiunz ussa puspè dar gas sin las pistas.
A Sölden survegn Thomas Tumler sia emprima schanza da la stagiun – d'ina stagiun cun in enorm punct culminant il favrer. En l'Italia dal Nord èn ils Gieus Olimpics da Cortina – Milaun. Per mintga sportista e sportist è quai il pli grond insumma durant ina carriera.
