Avant in pèr onns han ils organisaturs dal Maraton da skis engiadinais gì l’idea da schlargiar il program da l’emna dal maraton cun ina cursa en il stgir, la notg, nua che curriduras e curridurs fan passlung cun glisch da frunt. Quai che ha cumenzà avant set onns è uss pelvair etablì.
Curriduras e curridurs da l’entira regiun, dentant er da la Bassa, ch’èn gia en Engiadina per la cursa dal maraton, aman la cursa ch’è pervia dal stgir fitg speziala.
Cursa da notg è exausta, vendida ora
1'000 curriduras e curridurs fan il viadi la saira da Segl a Puntraschigna. Uschia è la cursa exausta. Gia dapi emnas publitgeschan ils organisaturs da la cursa che la cursa è vendida ora. Anc mai n'han uschè bleras persunas fatg part a la cursa da notg.
Er questa giada vegn la cursa, che vegn illuminada da quai da 250 fuschellas a vegnir in'aventura fitg speziala.
Favurits indigens
Or da vista grischuna vegn Curdin Räz da Segl a far part a sia cursa da chasa. Il passlungist da 26 onns aveva gudagnà la cursa da notg l’onn 2023. Er da la partida vegn ad esser Christa Ehrenzeller-Jäger. Avant in pèr dis ha ella manchentà il podest tar la cursa da dunnas be per pauc ed è vegnida quarta.