Per l’emprima giada ha lieu mez zercladur la lutga grischun-glarunaisa en l'Engiadina Bassa. L’elita da lutga dals chantuns Grischun e Glaruna, dentant era dad ulteriurs tschintg auters chantuns da la Svizra da l'Ost, cumbatta a Motta Naluns sin 2150 meters sur mar per il titel dal retg da la lutga grischun-glarunais.
Sport e tradiziun davant ina culissa da muntogna, quai è da spetgar da la Festa grischun-glarunaisa da lutga 2026 a Scuol. Si Motta Naluns sa scuntran lutgaders en il resgim e fans da la lutga sin la tribuna.
La Festa da lutga grischun-glarunaisa vegn organisada da la Societad da lutga engiadinaisa ensemen cun la Federaziun da lutga grischuna. Totalmain vegnan circa 130 lutgaders ad esser da la partida. Radund la mesadad da quels èn vegnids envidads dad auters chantuns. Uschia èn 20 Appenzellais s'annunziads, 25 da Son Gagl, 5 lutgaders dal chantun Schaffusa, 20 dal chantun da Turitg, 5 dal chantun Turgovia, 33 Grischuns e circa 20 Glarunais.
Armon Orlik per l’emprima giada sco retg da lutga
Gia tschintg giadas ha Armon Orlik da Maiavilla gudagnà «sia lutga», la lutga grischun-glarunaisa. La davosa giada l'onn 2023 a Flem. Suenter che ses frar pli vegl, Curdin Orlik, aveva gudagnà l’onn passà vul Armon Orlik puspè guardar ch'il titel dal retg da lutga grischun-glarunais turnia en il Grischun.
Sper il retg da lutga èn fin uss ulteriurs lutgaders s’annunziads. Uschia per exempel da la federaziun grischuna Christian Biäsch da Tavau Sertig, ed ils giuvens Niklas Lötscher da Vaz Sut e Josias Müller da Ziràn.
Sper ils lutgaders grischuns è Roger Rychen sco leader dals lutgaders glarunais da la partida sin la Motta Naluns a Scuol. Ultra da quai er ils dus frars Mario e Domenic Schneider dal chantun Turgovia, Fabian Kindlimann dal chantun da Turitg, dentant er Jeremy Vollenweider dal chantun da Schaffusa. Vollenweider aveva gudagnà la Festa grischun-glarunaisa il 2024 a Tavau. Tut quests atlets èn lutgaders cun cranz federal.
Er in quartet indigen è da la partida
Nominads per la festa grischun-glarunaisa èn er Claudio Regli da Tarasp, Flurin Alesch Felix da Sent, Loris Beer da Ftan ed Andri Thomas d’Ardez.
L’onur ch'il retg da lutga actual Armon Orlik è da la partida tar la Festa grischun-glarunaisa ils 13 da zercladur sin la Motta Naluns sur Scuol vegn ad esser gronda e procura segir per ina gronda culissa da fans che vegnan ad esser preschents.
Cun las pendicularas a la concurrenza
La concurrenza cumenza la damaun baud a las 08:00. Per arrivar al lieu da festa dovran ins la pendiculara che maina ensi sin passa 2000 meters sur mar. Sut tschiel avert pon las visitadras e visitaders persequitar l'eveniment sportiv sin la tribuna u era sin il pastg. Il bigliet d’entrada per la lutga includa il viadi sin la muntogna cun la pendiculara.
Sfidas d’organisar 50 dis avant la festa da lutga
Il comité d’organisaziun enturn il president Reto Rauch spetga enturn 3’000 fans da la lutga. La tribuna duai avair plazza per circa 1’000 aspectaturs ed aspectaturas. Circa tut quellas plazzas sajan gia vendidas, di Reto Rauch. Dentant saja enturn las quatter plazzas da resgim anc avunda plazza per il rest dals fans. Per porscher a tut ils fans ina bella festa, èn era 300 voluntaris e voluntarias da la partida. Da transportar ils 120 meters cubics da resgim, il material da la tribuna ma era il rest da l’infrastructura da la val sin muntogna, sarà ina sfida, di Reto Rauch.
Sperar sin la bell'aura
Dentant è il president optimistic che tut funcziuna ed è pront per la festa da lutga ils 13 zercladur.
In emna avant la festa vegni a dar anc blera lavur cun drizzar en la plazza ed il rest da l'infrastructura.
La gronda speranza è l’aura sitga. Quella è numnadamain decisiva per ina festa da success sut tschiel liber.