Giulia Tanno, la skiunza da freestyle grischuna, sto terminar anticipadamain sia stagiun. Ella è da novamain sa blessada. Sco quai che Swiss Ski scriva sin sia pagina d'internet, ha l'atleta da 25 onns rut il pe dretg durant la concurrenza da slopestyle a Mammoth Mountain en la California. Tanno è entant enavos en Svizra. Ella vegn operada ils proxims dis. In'emprima operaziun pitschna per stabilisar il pe han medis fatg gia en ils Stadis Unids.
Adina puspè disfortuna
Giulia Tanno è gia sa blessada pliras giadas ed ha perquai manchentà pliras concurrenzas grondas. Tranter auter aveva ella stuì desister pervia da blessuras dals gieus olimpics ils onns 2018 e 2022.
In success ha Tanno però pudì festivar avant bun in'emna. Sco terza ha ella gudagnà sia tschintgavla medaglia als X-Games ad Aspen en ils Stadis Unids da l'America.
