Tar la premiera avant in onn a Laax aveva Andri Ragettli er gist gudagnà. Per repeter quest success tar la cuppa mundiala da chasa sto l’atlet da Flem da 25 onns dentant mussà ina meglra prestaziun che quai ch’el ha fatg en il mezfinal. Il meglier da la qualificaziun è stà l’American Alexander Hall.
Er cuntanschì il final ha Fabian Boesch dad Engelberg. Il skiunz da freestyle da 26 onns è stà classà gist davos Andri Ragettli sco 8avel ed uschia pudì sa qualifitgar sco davos atlet per il final da la dumengia. La reserva sin il 9avel plaz munta a sulet 0,2 puncts.
Gian Andri Bolinger en letg enstagl sin pista
Crudà ora en il mezfinal è tranter auter Kim Gubser da Tavau sco 15avel. Gian Andri Bolinger che veva anc persvadì en la qualificaziun per il mezfinal ha stuì dar forfait. L’Engiadinais patescha d’ina grippa dal tract digestiv e n’ha uschia betg pudì ir a la partenza. Per ses frar Nicola Bolinger da Zuoz è la concurrenza da la cuppa mundiala a Laax gia stada a fin suenter la qualificaziun.
Atlets sa qualifitgads per il final da slopestyle:
- Alexander Hall (USA) 78.41 puncts
- Mac Forehand (USA) 77.05
- Birk Rudd (NOR) 75.15
- Henry Sildaru (EST) 73.98
- Colby Stevenson (USA) 73.43
- Max Moffatt (CAN) 71.43
- Andri Ragettli (SUI) 70.93
- Fabian Boesch (SUI) 68.76
