La tradiziun da lutga en il Sertig è gronda, damai che la festa da lutga che ha lieu là vala sco la pli veglia da l'entir Grischun. Dapi in pèr onns datti il di avant ch'ils activs fan lur lutgas en la val laterala da Tavau era ina lutga dals mats. Giuvenils en la vegliadetgna da set fin quindesch onns pon sa mesirar en quatter differentas categorias da vegliadetgna. Per ils lutgaders engiadinais è la lutga da mats da Sertig quasi sco ina lutga da chasa.
Nov engiadinais èn da la partida
Durant ils ultims dis èn ils giuvens lutgaders engiadinais sa preparads sin la festa da lutga da Sertig. Per ils ins è la festa a Sertig ina premiera, auters èn era gia stads en questa stupenta culissa a far la lutga. Per ils giuvens va quai en emprima lingia per ramassar experientschas. E sche propi tut grategia, alura èn forsa perfin plazzas tranter ils emprims tschintg pussaivlas.
Trenament da lutga a Ramosch
-
Bild 1 von 3. In trenament a Ramosch. Bildquelle: RTR.
-
Bild 2 von 3. Ils «griffs» èn impurtants. Bildquelle: RTR.
-
Bild 3 von 3. Far la lutga da cumpagnia. Bildquelle: RTR.
Occasiun da far la lutga cun auters
Per ils lutgaders engiadinais è quai grev da far il viadi or da la val sur ils pass – e da trenar tranteren era cun auters giuvens lutgaders. Els treneschan tranter els ed enconuschan uschia fitg bain lur collegas da squadra. La festa da lutga da mats a Sertig è perquai era ina stupenta occasiun per pudair far la lutga cun auters mats, cun da quels ch'ins n'enconuscha betg. Uschia vegn ins sez er adina pli ferm, mintgin profitescha da l’occasiun da pudair far la lutga cun auters mats da la medema vegliadetgna.