Jasmine Flury è la nova sportista grischuna da l’onn 2023. La skiunza da Tavau Monstein è vegnida onurada il venderdi saira a la 12avla notg da sport a Cuira per sias bunas prestaziuns da la stagiun passada. Ella è uschia la successura da Alex Fiva, il skicrosser ch'aveva gudagnà avant in onn quest titel. Flury è principalmain vegnida onurada per ses titel da campiunessa mundiala en la cursa rapida il favrer a Méribel. Sin il segund plaz è Annik Kälin che fa atletica leva e Fabiana Mottis che dat volleyball.
Ils ulteriurs victurs e victuras
Sco newcomer da l'onn è la mountainbikera Anina Hutter da Trimmis vegnida onurada. Il titel sco uniun da l'onn va al club da ballape Valposchiavo Calcio. Toni Cathomen da Rueras ha gudagnà l'elecziun sco trenader u funcziunari da l'onn per ses engaschi en il sport da passlung e sco sportist cun in impediment è Emiglio Pargätzi vegnì undrà, in skater en la sutga da rodas.
