Ils gieus paralimpics han lieu dals 6 enfin 15 da mars 2026 ed i vegn a dar 79 decisiuns da medaglias. Ils atlets e las atletas sa mesiran en las disciplinas para ski aplin, para biatlon, para passlung, para hockey, para snowboard e curling en la sutga cun rodas. Las cumpetiziuns han lieu a Cortina, a Tofane, a Milaun, e Tesero en la Val di Fiemme.
La Svizra è represchentada en quatter da las sis disciplinas. Dals nov atlets fan tschintg per l'emprima giada part a gieus paralimpics.
La finamira da quests gieus paralimpics saja tenor Tom Reulein che maina la delegaziun Svizra a Milano Cortina 2026 clera: Prestar megliers resultats co avant quatter onns a Peking 2022. Là ha numnadamain mo Théo Gmür gudagnà ina medaglia da bronz per la Svizra. «Trais medaglias èn la finamira. Nus avain gì bleras plazzas da podest en la cuppa mundiala questa stagiun ed i giascha naturalmain en la DNA dal sport d’elita ch’ins vul prestar buns resultats», quai manegia Reulein. Tenor Swiss Paralympic sajan Robin Cuche e Théo Gmür tar ski alpin ed Aron Fahrni tar snowboard ils favorits per medaglias – ad els trais saja era vegnì definì la finamira da las trais medaglias. Tenor il manader Tom Reulein datti dentant era ils atlets ch'el numna «stgarnuz da supraisas» – quai sajan plitost ils giuvens che sa partecipeschan senza squitsch e cun ina luccadad. El spera ch'ils atlets han durant las cursas e cumpetiziuns ina attatga da curaschi, uschia ch'i dat medaglias e diploms.
Luca Tavasci en acziun a Tesero
Luca Tavasci da Samedan en l’Engiadin’Ota è naschì cun il maun dretg che n’è betg sviluppà, uschia scriva quai Swiss Paralympic. L’onn 2016 s’ha el per l’emprima giada participà a la cuppa mundiala. Dal 2018 era el da la partida als gieus paralimpics a Pyeongchang e dal 2022 a Peking. Quest onn en l’Italia va el puspè a la partenza tar las cursas da passlung e las cumpetiziuns da biatlon. Luca Tavasci è l’emprima giada en acziun ils 7 da mars tar la cursa da para biatlon a Tesero.
