La fin da l'emna passada han ils campiunadis da powerlifting gì lieu a Paris. Per Gina Berther (31), oriunda da Rueras, è quai stà la terza participaziun a campiunadis mundials. Per l'emprima giada è ella dentant sa decidida da concurrer per il classament total da las trais disciplinas en la categoria fin 80 kg: Auzar ord la schanuglia, auzar la paisa giu dal banc ed auzar sur la crusch. Als campiunadis mundials valan las trais disciplinas sco disciplinas singulas. Lura vegnan ellas absolvidas sur trais dis. En la categoria dal classament total da las trais disciplinas sco Gina Berther ha absolvì, vegnan quellas absolvidas en in sulet di. A la fin finala vegnan las paisas quintadas ensemen.
Success cumplain
Gina Berther ha auzà 155 kg ord la schanuglia, 100 kg giu dal banc e 212,5 kg sur la crusch. En tuttas trais disciplinas è ella stada la meglra da la categoria da paisa fin 80 kg. Il total da 467,5 kg n'è betg mo stà il meglier da sia categoria, mabain da tuttas 32 dunnas ch'èn sa participadas ad ina categoria u l'autra fin 110 kg. En la disciplina auzar sur la crusch ha ella cuntanschì ina paisa da 212,5 kg. Quai è in nov record mundial.
Fin oz n'ha nagina autra dunna auzà ina paisa uschè greva. Quest record ha ella meglierà per tschintg kilos. Betg da surstair che Gina Berther è fitg cuntenta cun quellas prestaziuns: «Igl è stà l'emprima giada che jau sun ma participada a la categoria fin 80 kg. Fitg cuntenta sun jau surtut cun las emprovas che jau hai gì. Tuttas totalmain nov emprovas (mintgamai trais per disciplina) èn stadas valaivlas.»
Betg stà optimal
Ch'ils campiunadis mundials a Paris èn reussids uschè bain ha schizunt fatg surstar Gina Berther sezza: «Las preparativas n'èn betg stadas bunas. Fin in'emna avant ils campiunadis hai jau gì difficultads cun la musculatura dals chaluns. Latiers è vegnì fitg blera lavur durant l'emna ora, per part fin tard en la saira.» Dapi in onn e mez lavura Gina Berther sco cussegliadra d'immobiglias: «Jau lavur sur sasezza e per quest motiv è la lavur da prender cur ch'ella vegn.» En vista als campiunadis mundials saja ella dentant sa fidada da sasezza e da ses trenader, quai che saja a la fin finala stà in bun recept. Quellas preparativas plitost suboptimalas hajan apparentamain gì in effect positiv. «Damai che betg tut è stà optimal, na sun jau era betg stada nervusa.» Gina Berther che abita a Brig trenescha tranter 8 e 10 uras per emna e quai sper in pensum da lavur cumplain. Sco Gina Berther ha ditg sin dumonda, è era Savio Giossi, medemamain da Tujetsch, sa participà als campiunadis mundials. El saja dentant stà il sulet en la categoria dals juniors.
Senza drogas
Ils campiunadis mundials a Paris èn stads quels da l'Associaziun internaziunala da powerlifting senza drogas (International Drug-Free Powerlifting Association). Sco ins po leger sin la homepage da l'associaziun promova ella in sport fair e d'integritad dal powerlifting. Entras las controllas e sancziuns sin l'entir mund garantescha ella in sport schuber e l'egualitad da las schlattainas.