Finalmain – en Surselva datti puspè vita sin ils plazs da ballape. Suenter ina lunga pausa d’enviern da tschintg mais cumenza la runda da primavaira ed uschia la segunda mesadad da la stagiun da campiunadi 2025/26. Ils trais clubs Sursilvans èn pronts, ma cuntinueschan il campiunadi cun differentas finamiras.
Resultats e tabella
Tant l’USSI sco er Trun/Rabius e Lumnezia han pudì trenar e sa preparar bain sin la runda da primavaira, malgrà ch’ils Sursilvans han in handicap cumpareglià cun las equipas en la Bassa. Pervia da naiv èn ellas sfurzadas da trenar dapli en halla. Ma ellas han tuttas er chattà stupentas alternativas. Uschia pon Lumnezia e Schluein Glion magari ir a Domat u a Cuira a trenar, Trun/Rabius percunter nizzegia la chaschun da trenar a Mustér sin il plaz artifizial. Plinavant han tuttas trais equipas er absolvì almain in camp da trenament. Trun/Rabius e Lumnezia èn stads al Lago Maggiore e Schluein Glion a Barcelona. Durant in tal camp da trenament vai cunzunt er per tgirar il bun spiert d’equipa.
USSI ha en mira la 2. liga
La ferma equipa sursilvana, l’US Schluein Glion, ha persvadì durant la runda d’atun e gudagnà 9 dad 11 gieus. En la tabella sa chatta l’equipa da la Foppa sin il segund plaz, be in punct davos la capo-gruppa Sargans. Gia ils davos trais onns ha l’USSI mintgamai terminà la stagiun sin il segund plaz e mintgamai manchentà be per pauc la promoziun per la segunda liga. Tgi sa, forsa grategi quest onn. Vid la qualitad na manchi betg e cun cuntanscher il final da la Cuppa grischuna avant curt han ils da Schluein Glion gia ina giada suttastritgà lur ambiziuns da quest onn.
CB Lumnezia vul mitschar da la relegaziun
Far meglier che las davosas duas giadas cura ch’il CB Lumnezia ha mintgamai fatg il pass da la quarta en la terza liga, quai la devisa. Tant il 2019 sco er il 2022 han ils Lumnezians mintgamai suenter be ina stagiun en terza liga stuì turnar enavos en ina liga pli bassa. In cumbat encunter la relegaziun spetga er quest onn. Il trenader Marco Blumenthal e ses giugaders èn dentant da buna speranza che l’equipa vegn da sa tegnair fin la fin sur il stritg.
Durant la runda d’atun han cunzunt pliras pitgas mancà pervia da blessuras, pitgas ch’ina equipa sco Lumnezia na po betg simplamain remplazzar mo uschia. Plinavant ha er magari il cletg mancà, sco per exempel en omadus derbis encunter Trun/Rabius e Schluein Gion. Omadus gieus han ils Lumnezians pers cun 1:2. A Schluein è il gol decisiv schizunt crudà en la davosa minuta. La primavaira dastga Lumnezia retschaiver ils rivals sursilvans tar els a chasa a Vella. La motivaziun è uschia gronda per far revantscha.
CB Trun/Rabius adina constant amez la tabella
Las equipas a la testa èn lunsch davent, cun ils plazs a la cua da la tabella na vul Trun/Rabius er betg avair da far. Dapi che l’equipa da la Cadi ha fatg avant set onns il pass en la terza liga ha l’equipa adina terminà il campiunadi sin in plaz amez la tabella. Là sa chatta l’equipa che vegn trenada dapi trais onns da Claudio Bundi er suenter la runda d’atun.
Trun/Rabius ha il mument in’equipa pulit giuvna ed uschia manca magari anc l’experientscha, cunzunt en la defensiun. Bundi è dentant in trenader che giavischa che l’equipa dettia in ballape attractiv ed offensiv, mo uschia possia l’equipa sa sviluppar. La consequenza – Trun/Rabius sto magari prender encunter in gol che na stuess betg esser.
