Siglir tar il cuntegn

Header

Legenda: Maletg d'archiv. RTR, Gian Carlo Candinas
cuntegn

Ballape regiunal – decisiuns L’US Schluein Glion mitscha da la relegaziun

La US Schluein Glion gudogna il davos gieu da campiunadi encunter Montlingen cun 4:0 e mitscha da la relegaziun. Ils Lumnezians battan la segunda equipa da Schluein Glion cun 1:0 e fan uschia il pass en 3. liga e Laax gudogna cunter Sedrun-Mustér cun 3:1 e turna uschia enavos en 4. liga.

L’equipa da Schluein Glion ha en il davos gieu da campiunadi mussà ina da las meglras prestaziuns en questa stagiun e n'ha laschà nagina schanza a Montlingen. Per restar en la 2. liga han ils Sursilvans dentant er duvrà agid ester. E quai è succedì, damai ch'il FC Rheineck ha pers la partida cunter Arbon. Uschia ha Rheineck in punct damain che la US Schluein Glion e vegn uschia relegà en la 3. liga.

audio
Ballape regiunal: Schluein Glion gudogna cunter Montlingen
04:01 min, Sport ed actualitad dals 26.06.2021.
laschar ir. Durada: 04:01 minutas.

Gronda festa en la Lumnezia

Il CB Lumnezia ha dubel motiv da far festa. Ils Lumnezians han per l'ina gudagnà a Vella il derbi encunter la segunda equipa da Schluein Glion cun 1:0, per l'autra fan els en l’ultima partida da la stagiun il pass a la testa da la tabella e vegnan uschia promovids per la 3. liga. Il sulet gol da la partida è crudà avant pausa.

Durant ch’ils Lumnezians pon festivar la promoziun en ina liga pli auta, resta il CB Surses uschia vinavant en 4. liga. Ils da Surses fineschan la stagiun sin plazza dus da la tabella, in punct davos ils Lumnezians 

Laax turna puspè en 4. liga

Er il CB Laax s'avanza. Ils ballapedists da Laax pon puspè far il pass en quarta liga. En l'ultim gieu dal campiunadi ha Laax battì la sonda suentermezdi ordaifer la squadra da Sedrun-Mustér cun 3:1.

Passa 50 minutas han ils da Laax pudì dar cun in giugader dapli suenter che Sedrun-Mustér ha incassà ina carta cotschna. Avant dus onns èn ils da Laax vegnids relegads en la 5. liga. Suenter questa victoria turnan els puspè enavos en 4. liga.

Tar Trun/Rabius anc tut avert

Il CB Trun/Rabius ha gudagnà la dumengia cun 6:3 cunter il FC Sargans. Uschia ha l’equipa fatg il pass sur il stritg da la tabella. Anc n’èsi dentant betg cler sche Trun/Rabius po restar en la terza liga.

Decisiv è il gieu da la proxima fin d’emna cunter Gams, quels han sulet dus puncts retard sin Trun/Rabius. Uschia cumbattan las duas equipas en in duel direct cunter la relegaziun giu en la 4. liga.

RTR novitads 17:00

Artitgels legids il pli savens

Scrollar a sanestra Scrollar a dretga