Las stagiuns da ballape èn idas a fin la fin d'emna passada en tuttas ligas da ballape regiunalas. Suenter ils ultims gieus eri da principi cler, ch'il CB Lumnezia terminescha la stagiun en 3. liga sco 10avel. Quai cun in avantatg da set puncts sin la plazza da relegaziun.
Tar las dunnas dal Team Surselva eri medemamain cler ch'ellas termineschan l'emprima stagiun en 3. liga sco terzas cun in retard da 11 puncts sin il leader ed uschia sin la plazza da promoziun.
OFV fa mintg'onn midaments suenter la stagiun
Ma cun la fin da la stagiun n'è il quint final anc betg fatg. Suenter l'ultim gieu analisescha la Federaziun da ballape da la Svizra Orientala (OFV) numnadamain ils classaments da tut las ligas e controllescha, sche las differentas gruppas en las differentas ligas pon vegnir furmadas correctamain per la nova stagiun.
Per garantir ch'i dettia avunda equipas en mintga gruppa, po la federaziun prender decisiuns supplementaras davart promoziuns u relegaziuns. Er sche las classificaziuns sportivas paran da vegnir fixadas sin il plaz, pon quellas vegnir adattadas suenter la stagiun. Uschia è il CB Lumnezia uss tuttina vegnì relegà da la 3. en la 4. liga dals umens, entant ch'il Team Surselva promova en la 2. liga da las dunnas.
Motivs per promoziun respectiv relegaziun
Tar il Team Surselva hai da far cun il fatg ch'igl OFV engrondescha il dumber d'equipas en 2. liga dad 11 sin 12 equipas. Da quai profiteschan las Sursilvanas. Uschia dumogna l'equipa da la trenadra Bea Caduff da far entaifer dus onns la via da la 4. liga fin en 2. liga. Igl OFV haja infurmà ellas il glindesdi davart quest fatg. Ellas hajan lura stuì decider fitg spert sch'ellas veglian insumma far la promoziun. Il Team Surselva avess numnadamain er pudì dir Na a la promoziun.
L'emprima reacziun è propi stada: è quai in siemi u realitad?
L'equipa cun trenadras e trenaders sa legran en mintga cas sin questa nova sfida. Bea Caduff discurra d'ina bella sfida, savend ch'i vegn a vegnir tut auter che simpel en 2. liga.
Il CB Lumnezia ha gì il discletg ch'el è stà questa stagiun cun ses 22 puncts il mender terz-davos da las quatter gruppas en 3. liga. Sin fundament da la relegaziun da pliras equipas da la Svizra Orientala da la 2. liga interregiunala en la 2. liga regiunala, ha la relegaziun era tutgà in dals quatter davos terzs da la 3. liga sper ils dus davos da mintga gruppa. En ils 22 gieus dal campiunadi 2025/26 ha Lumnezia cuntanschì 22 puncts. Ils ulteriurs terzs davos da las autras trais gruppas han cuntanschì 23, respectivamain 25 puncts.
Gia las ultimas stagiuns èsi stà il cas che questas equipas ston, dasper las duas equipas a la fin da lur gruppa, far il pass en 4. liga.
Suenter in onn en 3. liga turnan ils Lumnezians uschia enavos en 4. liga. Perencunter dattan cun Panaduz e Landquart duas novas equipas grischunas puspè en 3. liga proxima stagiun. Cunquai che la US Schluein Glion ha dumagnà la promoziun en la 2. liga regiunala, vegn il CB Trun/Rabius dentant ad esser l'unica equipa sursilvana en 3. liga durant la stagiun 2026/2027.