Siglir tar il cuntegn

Header

cuntegn

Ballape regiunal Schluein Glion declassescha Tusaun/Cazas

Ils dus finalists da la Cuppa grischuna da ballape, Valposchiavo Calcio e l'US Schluein Glion, restan er sin in'unda da success en la 3. liga regiunala. Durant ch'il leader ord il Puschlav ha gudagnà ordaifer encunter il FC Triesenberg cun 3:1 ha l'US Schluein Glion battì a chasa en l'Arena Crap Gries l'equipa da Tusaun/Cazas gist cun 6:2. Per la decisiun han ils da Schluein procurà cun quatter gols en la davosa bun mes'ura, quai suenter ch'i steva pari 2:2 suenter bun 50 minutas. Cun trais gols è Lars Caduff stà l'um dal gieu.

Suenter la terrada en il mezfinal da la Cuppa grischuna encunter Valposchiavo Calcio ha il CB Trun/Rabius era pers en il campiunadi. L'equipa da la Cadi ha pers a Triesen cun 1:3.

En la tabella resta Valposchiavo Calcio a la testa cun 35 puncts, dus puncts avant l'US Schluein Glion. Sin il terz plaz cun 30 puncts suonda il FC Ruggell ch'ha pers la fin d'emna ordaifer a Schaan cun 1:2. Il CB Trun/Rabius resta sin il 9avel plaz da la tabella cun 12 puncts.

Domat perda il contact cun la testa

En la segunda liga regiunala ha il Club da ballape da Domat stuì magunar ina terrada. Domat ha pers a chasa encunter il FC Montlingen cun 2:3, quai suenter ch'ils indigens manavan anc da pausa cun 1:0. En la tabella croda Domat uschia sin il 5avel plaz cun 23 puncts, sis puncts davos il leader, il FC Vaduz.

RTR novitads 20:00

Artitgels legids il pli savens