Durant trais dis è l’elita dal sport da trair a tschoccas svizra s'inscuntrà a Scuol per ils campiunadis svizzers. En la halla da glatsch Gurlaina han giugadras e giugaders ed equipas da l’entira Svizra cumbattì per differents titels da campiun.
Success per l’equipa indigena ES Sur En
- Gist duas medaglias dad aur ha gudagnà Claudio Mathieu dal ES Sur En. Durant la concurrenza da precisiun singula ha il giugader da Ramosch giugà en ina atgna liga. Cun 136 puncts avantatg ha el gudagnà suveranamain il titel da campiun svizzer.
- La victura tar las dunnas è stada Katja Loher dal ESC Soorsischliifer. Marta Bundi da Sursaissa ha gudagnà la medaglia da bronz.
- Sper il success en la disciplina da precisiun singula ha Claudio Mathieu er gudagnà il titel ensemen cun Marina Bott dal EC Sur En cun l’equipa mixta.
- Per il EC Sur En ha quai dà ulteriuras duas medaglias. Tar las concurrenzas d’equipa ha tant la squadra da las dunnas, sco era quella dals umens gudagnà la medaglia da bronz.
Success grischuns er tar las concurrenzas da junioras e juniors
- Il ESC San Murezzan cun Philipp Melcher e Francesco Pellegrino ha gudagnà il titel da campiun svizzer tar la concurrenza d’equipa tar ils juniors.
- E per finir ha Francesco Pellegrino era anc gudagnà la medaglia da bronz tar la concurrenza da precisiun singula.
Avant il campiunadi svizzer da trair a tschoccas a Scuol
Dapi radund 15 onns datti il club da trair tschoccas «ES Sur En». L’equipa è da chasa en l'Engiadina Bassa e trenescha e dat turniers sin l’agen glatsch a Sur En da Sent. Giusum la val en vischinanza dal campadi creeschan ils commembers e las commembras dal club mintga enviern in stupent glatsch per pudair trair tschoccas.
Il sport ch'è uriundamain da la Scandinavia ed ha fermas equipas en l'Austria, la Germania ed en l'Italia è uschia era preschent en Engiadina. E l’equipa dal «ES Sur En» ha era gia pudì festivar gronds success tar campiunadis svizzers.
Duas medaglias ha Claudio Mathieu gia gudagnà
Gia sco mattet ha Claudio Mathieu ch'è uriundamain da Ramosch cumenzà cun il sport da trair tschoccas. Lura dentant be sco plaschair durant la scola. Suenter il temp da scola ha el laschà da la vart il sport.
Pir dapi ils ultims onns ha Claudio Mathieu puspè cumenzà a trenar pli intensiv il trair a tschoccas.
Ina medaglia tar la concurrenza da precisiun fiss schon flot.
Il trenament ed ils sforzs han purtà fritg. En la concurrenza da precisiun è el vegnì l’onn 2024 campiun svizzer e cun la squadra dal «ES Sur En» er gia vicecampiun svizzer. Part da quella equipa eran er Orlando Bass, Jachen Benderer ed Otto Davaz.
