Dapi radund 15 onns datti il club da trair tschoccas «ES Sur En». L’equipa è da chasa en l'Engiadina Bassa e trenescha e dat turniers sin l’agen glatsch a Sur En da Sent. Giusum la val en vischinanza dal campadi creeschan ils commembers e las commembras dal club mintga enviern in stupent glatsch per pudair trair tschoccas.
Il sport ch'è uriundamain da la Scandinavia ed ha fermas equipas en l'Austria, la Germania ed en l'Italia è uschia era preschent en Engiadina. E l’equipa dal «ES Sur En» ha era gia pudì festivar gronds success tar campiunadis svizzers.
Duas medaglias ha Claudio Mathieu gia gudagnà
Gia sco mattet ha Claudio Mathieu ch'è uriundamain da Ramosch cumenzà cul sport da trair tschoccas. Lura dentant be sco plaschair durant la scola. Suenter il temp da scola ha el laschà da la vart il sport.
Pir dapi ils ultims onns ha Claudio Mathieu puspè cumenzà a trenar pli intensiv il trair a tschoccas.
Ina medaglia tar la concurrenza da precisiun fiss schon flot.
Il trenament ed ils sforzs han purtà fritg. En la concurrenza da precisiun è el vegnì l’onn 2024 campiun svizzer e cun la squadra dal «ES Sur En» er gia vicecampiun svizzer. Part da quella equipa eran er Orlando Bass, Jachen Benderer ed Otto Davaz. Tuts èn er uss tar il campiunadi svizzer a chasa a Scuol da la partida cul «ES Sur En». E sa chapescha ch'els vulan cumbatter er a chasa per ina ulteriura medaglia.
