Il final da las dunnas absolvan las duas actualmain meglras equipas da ballape da las dunnas dal Grischun. Las dunnas da Tusaun/Cazas dattan en 2. liga ed èn actualmain sin plazza tschintg. Il Team Surselva da dunnas absolva il campiunadi en 3. liga, ellas en da chattar actualmain sin il stupent terz plaz e quai gia en l'emprima stagiun en questa liga. Pir l'onn passà èsi numnadamain grategià a l'equipa da far la promoziun da la quarta en la terza liga.
Il favurit èn quest final è segir Tusaun/Cazas ch'è ina liga pli auta e ch'è dapi onns il numer 1 en il ballape da dunnas grischun. Dapi il 2012 ha l'equipa da Tusaun gudagnà 10 giadas la Cuppa grischuna. Il Team Surselva è perencunter per l'emprima giada insumma finalist.
In final plain tensiun è er garantì tar ils umens. Valposchiavo Calcio mussa in campiunadi excellent en la 2. liga regiunala e giascha il mument sin il quart plaz. Da 21 gieus en questa liga ha l'equipa dal Grischun dal Sid pers mo tschintg fin uss. D'Ascensiun frunta Valposchiavo Calcio sin il defensur dal titel da la Cuppa grischuna da l'onn passà, Schluein Glion. L’equipa da la Foppa è il mument sin l'emprim rang en 3. liga cun bunas schanzas da far il pass si en la 2. liga. Dals 16 gieus da campiunadi fin uss ha ella gudagnà 13.
Il final da la Cuppa grischuna tranter Valposchiavo Calcio e l'US Schluein Glion è nagut nov. L'ultima giada hai dà quest final il 2023, cura che las duas equipas eran rivals en 3. liga. La meglra fin en quest final avant trais onns hai dà per la USSI ch'ha triumfà 3:1.
Ma cunquai ch'ils Puschlavins èn en il fratemp daventads in top-team en la 2. liga regiunala, cun divers novs giugaders, van els segir sco favurits en quest final.