En in final ch’è stà ditg guliv han ils Puschlavins, che dattan en 2. liga regiunala, gudagnà cun 4:1 encunter l’US Schluein Glion da la 3. liga.
Il gieu ha cumenzà plain schlantsch. Gia en la 5avla minuta è la USSI ida en avantatg entras in gol da Lars Caduff che ha tutgà cun in bel sajet en il chantun lung. La reacziun da Valposchiavo Calcio è dentant vegnida immediat entras Nicolo Pola, che ha egualisà ina minuta pli tard ord curta distanza.
Fin en la 60avla minuta èsi lura stà in gieu guliv cun schanzas sin omaduas varts. La fin finala ha lura in penalti manà il gieu da la vart puschlavina. Sin quest cuntragol n’han ils da Schluein betg chattà ina resposta. Anzi, l'equipa dal Puschlav ha anc auzà tochen tar il schul final entras dus gols dal capo-tiragols Mattia Cathieni sin 4:1. In resultat che na mussa dentant betg l'entir maletg da quest final. Ditg n'han ins betg vis ina differenza da liga tranter las duas squadras. Mo la rutina ed experientscha dals Puschlavins è dentant sa mussada en l'ultima fasa dal gieu.
Valposchiavo Calcio ha mussà daco ch'els dattan dapi trais onns en 2. liga e daco ch'els èn da chattar actualmain sin plazza 4 da la tabella. La giuvna equipa da la USSI ha dentant er mussà ch'els vegnan da tegnair pitg durant la gronda part dal gieu ad in'equipa da 2. liga.
Schluein Glion vuleva defender il titel
Per Valposchiavo Calcio è il duel encunter l'Uniun Sportiva da Schluein Glion ina partida ch'ins enconuscha. Gia il 2023 era il duel Valposchivo Calcio vs. Schluein Glion la partida da final da la Cuppa Grischuna. Lura aveva Valposchiavo Calcio pers il duel encunter l’equipa sursilvana. Cler che Valposchiavo Calcio vul perquai prender questa giada revantscha.
Rotaziun cun ils giugaders
Las emnas nua che las equipas dattan anc partidas da la cuppa da ballape grischuna èn intensivas. La fin d'emna vegn dà il gieu da campiunadi, e durant l’emna anc ina partida da la cuppa grischuna. Questas emnas cun gieus en differents campiunadis numnan ins emnas englaisas.
Per ch'ils giugaders na vegnan betg strapatschads damamia, rotescha Valposchiavo Calcio ses giugaders. Vul dir, betg adina la medema equipa dat las partidas da campiunadi en segunda liga e durant l’emna ils gieus da la coppa grischuna.