Per l'emprima giada en l'istorgia dal club ha il HC Partenz-Signuradi cuntanschì il final dals playoffs en l'emprima liga ed uschia scrit in nov chapitel. En quest final spetga cun l'EC Wil però ina dira nusch. Ils Songagliais n’èn betg sulet il defensur dal titel, els han er dominà la stagiun actuala. Wil ha gudagnà 18 da 20 gieus da la qualificaziun, tranter auter er tut ils quatter duels cun il club dal Partenz.
Sin palpiri è tut cler, ma ils playoffs scrivan lur atgnas istorgias ed en in final è tut pussibel.
Cun Wil ha il Partenz-Signuradi plinavant anc in quint avert. Avant in onn èn ils Grischuns vegnids franads da Wil gia en il mezfinal. Uss survegn Partenz-Signuradi la schanza da far revantscha cunter Wil che persvada cunzunt offensiv. Ils attatgaders da Wil n'èn strusch da franar e sajettan gols en seria.
Ils da Wil èn enconuschents ch'i laschan siglir la chicra sch’ins gioga in zic pli corporal. Nus na lain betg giugar tschuf e malgist, dentant cun emoziuns e cun direzza.
Wil na duai dentant betg esser la staziun finala en questa stagiun da hockey. Il HC Partenz-Signuradi siemi dal titel naziunal en questa emprima liga. Perquai ston els l'emprim gudagnar la seria da best-of-five cunter Wil e silsuenter gudagnar il duel cun il victur dal campiunadi d'emprima liga dal vest da la Svizra.
Durant ils playoffs na fatsch jau betg la marca e sun uschia in zic pli maltarschinà. La dunna n'ha betg plaschair da quai, mo quai tutga vitiers e sto esser durant quest temp.
La seria da final tranter l’EC Wil ed il HC Partenz-Signuradi cumenza la gievgia, il 5 da mars a Wil.