Trais giadas gieus olimpics, differents campiunadis mundials – Irene Cadurisch, oriunda dad Isola, è stada da l’entschatta ina sportista impurtanta sper las trais soras Gasparin en il mund dal biatlon. Gronds success, ma Irene Cadurisch ha era gì muments difficils sco per exempel il collaps a la staffetta a Peking durant ils gieus olimpics l’onn 2022.
Il temp suenter quel collaps è stà fitg grev per ella – Irene Cadurisch aveva dentant decidì da cuntinuar cun il sport da prestaziun, ma la via è stada lunga e dira. Malgrà il trenament intensiv n’ha ses corp betg reagì sco giavischà e bleras giadas era ella malsauna en muments decisivs.
Per la sportista ch'aveva midà cun 17 onns tar il biatlon, era cler, la stagiun 2025/2026 duess esser sia ultima da sia carriera sco biatleta. Per terminar sia carriera dal sport da prestaziun aveva Irene Cadurisch ina gronda finamira. Ella vuleva sa qualifitgar anc ina giada per ils gieus olimpics a Cortina/Milano dal 2026.
Decidì suenter la cursa da qualificaziun
Ils 22-11-2025 è l’atleta da 34 onns sa participada a la cursa da qualificaziun. Sia prestaziun n’ha betg tanschì per sa qualifitgar. Perquai è il siemi olimpic ì giu per l’assa. Uschia terminescha ella sia carriera cun la fin da la stagiun. Quai ha ella communitgà dacurt sin Facebook.
Per l’atleta da 34 onns in fatg fitg difficil, ma tuttina guarda ella cun dus egls rients sin ses temp da profi e spera ussa, da pudair far anc ina segunda carriera – forsa era en connex cun ses sport amà, il biatlon, ubain en sia professiun sco duaniera. Dal rest: Er Selina Gasparin è da professiun duaniera e lavura en quella professiun dapi la fin da sia carriera da profi.