Per il giuven mountainbiker da Lumbrein va in siemi en vigur. Alessandro Solèr è per l’emprima giada en sia carriera vegnì selecziunà da Swiss Cycling per in eveniment grond. Il Lumnezian dastga parter ils proxims dis al campiunadi d’Europa sin il Monte Ceneri en il Tessin e la fin d’avust er al campiunadi mundial en la Val di Sole en l’Italia.
Alessandro ha lavurà uschè fitg sin questa finamira ed el ha merità da pudair ir a la partenza dal campiunadi d’Europa e dal campiunadi mundial. E nus sco geniturs essan loschs sin el.
Il plaschair saja grond, e cunzunt saja quai er in levgiament, di Alessandro Solèr. Quella finamira haja el numnadamain gì davent dal cumenzament da la stagiun e las cursas dal campiunadi d’Europa en Svizra e quellas dal campiunadi mundial en l’Italia haja el nudà ferm en l’agenda. Ina surpraisa che Swiss Cycling ha risguardà il Lumnezian che parta en sia davosa stagiun cun ils juniors U19 n’èsi betg dal tut. Solèr ha numnadamain mussà stupents resultats fitg constants durant l’entira stagiun.
Dar tut e rimnar blera experientscha
La finamira saja da dar tut per pudair turnar a chasa cun buns resultats. Plinavant vai dentant era per rimnar experientscha a questa premiera. Il percurs gist sin il Monte Ceneri enconuscha Alessandro Solèr fitg bain. Là ha el gia fatg diversas cursas, magari dentant er cun schlettas experientschas. Gist al cumenzament da l’onn è el cupitgà fitg sin quest percurs fitg tecnic e pretensius. Dacurt han el e ses collegas svizzers dentant anc ina giada pudì trenar durant trais dis al Monte Ceneri per uschia emprender d’enconuscher anc meglier il percurs per la finala er pudair nizzegiar quest avantatg da chasa.
Mia sora Chiara po cunzunt dar a mai tips quai che pertutga il pachetar, là sun jau in pau in caot.
Per tips e trics po Alessandro Solèr la finala er ir tar Vital Albin, l’auter Lumnezian ch’è er vegnì selecziunà e che parta cun ils umens d’elita. Tips pudess er la sora Chiara dar che parta normalmain en la categoria U23 che n'è dentant betg a la partenza . Pervia da la mancanza da resultats ed er pervia da blessuras è Chiara sfurzada da persequitar quests puncts culminants da l’onn be a l’ur. Ella vegnia dentant franc a sustegnair il frar, cunzunt al campiunadi d’Europa en il Tessin, quasi avant l’isch-chasa.
