La passlunghista engiadinaisa da 25 onns ha gudagnà l’elecziun sco sportista grischuna da l’onn 2026. Nadja Kälin ha scrit istorgia als davos gieus olimpics a Milaun e Cortina. Ensemen cun Nadine Fähndrich ha ella gudagnà argient en il sprint d’equipa. Al davos di ha ella gudagnà sensaziunalmain la medaglia da bronz en la disciplina roiala, la cursa da 50 kilometers.
Sin Kälin suonda Kälin
Nadja Kälin gudogna il titel 2026 ed è uschia la successura dad Annik Kälin (atletica leva) ch'era vegnida tschernida il 2025 sco sportista grischuna da l'onn.
Nadja Kälin è la nova staila svizra en il sport da passlung. Gia sco juniora ha la sportista da San Murezzan mussà ses potenzial. Ses debüt en la cuppa mundiala ha ella dà il december 2021. Al campiunadi mundial U23 il 2024 ha Kälin tranter auter gudagnà argient en la cursa da 10 kilometers en il stil classic e bronz cun la staffetta maschedada. Persvadì ha Nadja Kälin lura cunzunt er al davos campiunadi mundial avant bun in onn a Trondheim cun quatter plazzas sut las top otg.
Per il grond coup ha ella lura procurà il favrer en la Val di Fiemme. Nadja Kälin è l’emprima passlunghista svizra che gudogna in medaglia singula a gieus olimpics.
Il 2022 aveva ella er gudagnà per l’emprima giada il maraton da skis engiadinais, la cursa tar ella a chasa.
Lara Heini – la garanzia en il gol da l'equipa naziunala svizra d'unihockey
L’elecziun sco sportistA grischunA da l’onn 2026 ha Nadja Kälin gudagnà avant Lara Heini e Lea Meier. Heini, la golia da l’equipa naziunala dad unihockey, ha tranter auter festivà il december il titel da campiunessa mundiala. Gia al cumenzament dal 2025 aveva ella gudagnà cun il Team Pixbo Wallenstam da la Svezia il Champions Cup. En omadus finals n’ha Lara Heini laschà far nagins gols ed è perquai er vegnida onurada sco segunda meglra giugadra d’unihockey dal mund per l’onn 2025, quai davos la Finlandaisa Veera Kauppi.
Lara Heini dat gia dapi passa dus decennis unihockey. Suenter sis titels da campiunessa svizra cun Piranha Cuira ha ella midà il 2018 tar Pixbo Wallenstam, in club da classa en la vischinanza da Göteborg.
Lea Meier – la nova speranza grischuna en il biatlon
La biatleta Lea Meier ha merità in plaz tranter las top 3 a questa elecziun sco sportistA grischunA da l’onn grazia a sia bunas prestaziuns durant la stagiun passada nua che la biatleta dal Partenz ha propi fitgà pe en la cuppa mundiala. Ses grond potenzial aveva Meier gia mussà il 2020 cun daventar campiunessa mundiala tar las junioras en la cursa singula a Lai. Al cumenzament dal 2022 ha ella pudì dar ses debüt en la cuppa mundiala. E malgrà che Lea Meier n’era anc mai stada classada sut las top 10 en ina cursa da la cuppa mundiala ha ella gudagnà als davos gieus olimpics gist dus diploms, in cun la staffetta e lura sco 7avla en la cursa singula sur 15 kilometers.
Lea Meier ha visità il gimnasi da sport a Tavau ed abitescha oz a Lai, a l’ur da l’Arena da biatlon.
UlteriurAs victurAs a la Notg da sport grischuna 2026
- Newcomer: Xenia Von Siebenthal, snowboard
- Funcziunari: André Müller, ski mountaineering CAS
- Uniun: Iron Marmots Tavau-Claustra, unihockey
- Persuna/Uniun cun impediment: Club da sutga da rodas grischun
Victuras e victurs èn vegnids onurads per lur prestaziuns ed engaschi per il sport a la Notg da sport grischuna, ina saira da gala en l’Auditorium da la Banca Chantunala a Cuira.