Il passlunghist tujetschin Cla-Ursin Nufer è in dals 24 atlets ed atletas che Swiss Ski ha nominà per las cursas da la cuppa mundiala da chasa a Tavau. Per Nufer èsi er in grond pass enavos. Ils davos dus onns ha el numnadamain stuì persequitar questas cursas al pe dal Flüela be a l’ur. La raschun: L’atlet da 24 onns aveva survegnì l’atun 2023 la diagnosa – sindrom da surtrenament. Bun in onn e mez è el stà sfurzà da far pausa.
Dar si na saja mai stà in’opziun, er sche quai saja stà in temp sgarschaivel, di Cla-Ursin Nufer. El haja però er emprendì ina massa ed oz treneschia el auter, pli disciplinà, pli plaun ed er pli pauc. Quest burnout dal corp, sco ins po er numnar quest sindrom da surtrenament, aveva Cla-Ursin Nufer survegnì perquai ch’el aveva trenà da memia, in sbagl che capita savens ad atletas ed atlets giuvens.
Encunter la fin da la stagiun passada ha il passlunghist tujetschin pudì far las emprimas cursas ed uschia ils emprims pass enavos. Oz giaja bain cun el ed el haja er pudì trenar bain durant la stad passada, ma el na saja anc betg sin quest nivel sco avant la diagnosa da surtrenament, uschia Cla-Ursin Nufer. Sper las cursas a Tavau spera Nufer ch’el survegni anc ulteriuras schanzas en la cuppa mundiala, cunzunt er la fin schaner a Goms en il Vallais.