Perl Season End Festival - Plaschair e trenament en cumbinaziun

Durant sia carriera activa aveva il passlungist engiadinais Curdin Perl adina l’impressiun ch'i duvrass a la fin da la stagiun anc ina sort trenament da cumpagnia.

Suenter che las cursas da la cuppa mundiala èn tras, duai anc dar la pussaivladad da trenar enavant e da nizzegiar las bunas relaziuns da naiv en las valladas pli autas. Forsa insatge sco ina sort staffetta, u ina cumbinaziun tranter trenament e cursas, forsa perfin cun lezias d’inschign.

Curdin Perl era simplamain a la tschertga dad insatge nua che passlungistas e passlungists pudessan far a la fin da la stagiun anc trenaments. Durant ses temp activ na devi betg quella pussaivladad. Uss emprova l’anteriur passlungist da sporscher exact quai a profis, dentant era a passlungistas e passlungists populars.

Trenar e far cursas da cumpagnia

Durant trais dis han passlungistas e passlungists la pussaivladad da trenar e da far cursas en ina equipa cun auters. L’equipa sa cumpona adina da curriduras e curridurs professiunals e vegn cumplettada cun curriduras e curridurs populars e juniors. Uschia san ins far part als differents trenaments u a las cursas sco equipa da cuminanza.

Impressiuns dal Perl Season End Festival

Tar il Perl Season End Festival a Segl en Engiadin'Ota han atletas ed atlets a la fin da la stagiun anc ina giada la pussaivladad dad ir ensemen sin la loipa.

Tar il festival na vai dentant en emprima lingia per cursas en il vair senn dal pled. Las cursas èn ina sort cumbinaziun tranter cursa, avair e trenar l’agen inschign e far concurrenzas per exempel per ils chanals da social media.

Trenar per il maraton cun Curdin Perl

Nadja e Marina Kälin, Roman e Fabienne Alder

Bunamain 100 passlungistas e passlungists èn da la partida tar il Perl Season End Festival a Segl. Tranter quels er passlungistas e passlungists professiunals, sco per exempel las soras Nadja e Marina Kälin da San Murezzan, ed ils fragliuns Roman e Fabienne Alder da Puntraschigna.