La regiun da Scuol en l’Engiadina Bassa è enconuschenta sco eldorado da velo. Gia dapi passa 20 onns datti en la regiun per exempel la cursa dal Bikemaraton dal Parc Naziunal. La cursa ha survivì tut las crisas ed è anc oz ina da las grondas cursas da mountainbike en Svizra. U lura dat quai era gia dapi blers onns la cursa dal Radmarathon cun partenza ed arrivada a Zernez, er en Engiadina Bassa. L’eveniment Queens days a Scuol vul uss porscher insatge per tut ils differents geners da far sport sin il velo. E quai be per dunnas.
Dunnas sin il velo
Durant trais dis datti a Scuol da tuttas sorts occurrenzas cun il velo. E quai be per dunnas. Dunnas interessadas vi dal sport da velo pon per exempel far turas da mountainbike u ellas pon passentar uras sin in nov gener da velo, l'uschenumnà gravelbike. Quai è in velo ch'è in zichel in mountainbike, dentant era velo da via. E las dunnas pon emprender anc meglier la tecnica dad ir cun velo. Guidas da la regiun e sportistas professiunalas mussan a las dunnas interessadas co ins po far ina passascha difficila sin il mountainbike.
