En la sessiun d'avantmezdi dal terz di al campiunadi europeic da bittar lantscha da las U20 a Tampere en Finlanda ha la Grischuna Selina Capaul procurà per in highlight svizzer. Gia en l'emprima emprova ha la Grischuna bittà la lantscha 51,62 meters, quai èn gia 4 centimeters pli lunsch che ses record fin lura da 51,58 meters. E lura ha ella anc sa meglierada ina giada e bittà la lantscha 52,44 meters – quai èn stads bun 50 centimeters davos il terz plaz. Quai scriva Swiss athletics sin sia pagina d'internet.
En la glista dals megliers svizzers dals U20 da tut il temp è Selina Capaul cunquai sin plazza 4 davos Géraldine Ruckstuhl, Nathalie Meier e Sabrina Boss.
Carriera da Selina Capaul
En sia carriera anc giuvna ha Selina Capaul gia gudagnà plirs titels da campiunessa svizra en bittar la lantscha. Ed als gieus olimpics europeics da giuventetgna è ella vegnida duas giadas quarta (2022 e 2023) ed ha manchentà be per pauc la medaglia da bronz.
En la categoria da las sut 20 onns è la lantscha lura vegnida per 100 grams pli greva ed ha uss la paisa da l'elita. Era sche 100 grams parian forsa pauc, en il bittar la lantscha dovri dapli forza ed igl è d'adattar la tecnica per ch'ella sgolia lunsch.
La fin zercladur ha Selina Capaul bittà l'emprima giada en sia carriera la lantscha sur 50 meters. A l'occurrenza internaziunala a Mannheim è sia lantscha sgulada sin 51,58 meters, tge ch'ha muntà la victoria ed a medem temp nov record grischun.
Jau n'hai nagins pleds per quai – vegn a restar a mai per adina.
Quella marca da passa 51 meters catapultescha era gist Selina Capaul a ses emprims campiunadis europeics d'atletica leva U20 si en Finlanda (07 – 10 d'avust a Tampere).
Ses plaschair è enorm – tantpli ch'i na sa chapescha betg da sez che l'atleta da Domat è en il ravugl da la delegaziun svizra. La giuvna da 19 onns, ch'ha gist terminà il gimnasi, ha il Long-Covid ch'ha franà ella ed impedì da trenar. Selina Capaul raquinta da sia stancladad permanenta sur passa in onn e mez e da betg pudair sa concentrar. Dentant ha ella chattà ina terapia d'oxigen che gida. Questa stagiun ha ella puspè pudì auzar l'intensitad da far sport, bain savend ch'ella ha anc deficits, surtut en l'atletica.
Da Long-Covid als campiunadis europeics U20
Per ina Grischuna è la disciplina da bittar la lantscha in sport main usità. Ed er en Svizra na paran betg uschè blers da pratichar questa disciplina. En la categoria da las sut 20 onns è Selina Capaul numnadamain la suletta Svizra che Swiss Atletics ha selecziunà per la EM si en Finlanda. Per la giuvna da Domat va in siemi en vigur. Sia finamira declerada per quest onn è stada da sa qualifitgar per ses emprims campiunadis europeics.
En la rangaziun europeica da bittar la lantscha è Selina Capaul l'actuala numra 11. A l'occurrenza internaziunala a Mannheim, ch'ella ha gudagnà ultimamain, che vala sco impurtant meeting d'atletica leva per talents giuvens, è la concurrenza stada gronda. Ina fermezza da la Rumantscha è da pudair sa focusar e pudair clamar giu ses maximum quest ominus «di X». Ella emprova da betg sa laschar influenzar da tut quai che capita enturn ella. Ed uschia ha ella bittà sia lantscha pli lunsch che quatter atletas ch'èn en las top 10 da la rangaziun europeica – tranter quellas las numras 3 e 4 da l'Europa.
Siemiar dastgan ins adina, era d'ina medaglia. Mintgina ch'è sa qualifitgada sa ch'ella è buna. Pudair represchentar la Svizra è insatge spezial ed ina aventura che nagin po prender a tai.
Sia premiera a quella EM d'atletica leva en Finlanda vul Selina Capaul surtut era nizzegiar per rimnar experientschas. Ed ella na vul betg far massa bler squitsch a sasezza. Cura ch'ella stat lura propi cun sia lantscha en il stadion a Tampere, vegni ina giada dapli a daventar conscient, quant impurtant ch'il sport è per ella. La malsogna da Covid e tut quai ch'ella ha tuttina gia cuntanschì, laschia vegnir pertschert, da mai dar si e filar vinavant vi da sias finamiras e ses siemis.
Or da l'archiv
