A Selina Capaul da Domat èsi reussì la fin d'emna passada da bittar la lantscha d'elita (600 grams) uschè lunsch sco anc mai, numnadamain 51,58 meters – quai ad in'occurrenza d'atletica leva a Mannheim per talents giuvens. Igl è l'emprima giada insumma ch'ina Grischuna bitta la lantscha en la categoria d'elita sur 50 meters. Quai scriva ses trenader e bab en ina communicaziun.
Gudagnà la concurrenza a Mannheim
La concurrenza da talents giuvens a Mannheim, en Germania, ha Selina Capaul gudagnà. Be ella ed anc in'ulteriura concurrenta han dumagnà da bittar la lantscha pli lunsch che 50 meters. La concurrenza a Mannheim valia sco turnier da qualificaziun impurtant per ils campiunadis europeics U20 ch'èn l'avust en Finlanda. Swiss Athletics fa il fanadur la selecziun d'atletas ed atlets che pon far part als campiunadis europeics.
Cun ses nov record è Selina Capaul da nov sin rang 17 da la rangaziun mundiala da las atletas che tiran la lantscha. Gia ils ultims onns aveva l'atleta da 19 onns bittà la lantscha sur 50 meters, quai dentant cun lantschas pli levas en categorias da juniors.