L’EHC Arosa, in club da hockey sin glatsch cun ina lunga tradiziun, ha terminà la davosa stagiun sin l’ultim plaz da la Swiss League. Cun il pli pitschen budget da la liga e cun ina squadra che sto vegnir quasi cumplettamain reconstruida, restan las sfidas. Tuttina regia speranza e la finamira resta da sa stabilir en la segunda pli auta liga da hockey en Svizra.
Difficultads finanzialas sco obstachel principal
Cun in budget da damain che dus milliuns francs è l’EHC Arosa il club cun las pli bassas resursas finanzialas en la Swiss League. Quai restrenscha las pussaivladads da recrutar novs giugaders u da prolungar contracts existents. Actualmain è be in quart da la squadra per la nova stagiun ensemen, entant ch’in grond dumber da giugaders ha bandunà il club.
Prioritads sportivas e giugaders impurtants
Suenter ina stagiun difficila vulan ils responsabels evitar in repetiziun da la prestaziun da la stagiun passada. Ina da las prioritads è da tegnair giugaders impurtants sco Emilius Krakauskas.
Malgrà las circumstanzas difficilas resta il mainafatschenta da l'EHC Arosa Christian Modes calm e conferma ch’ils plans per la nova squadra èn en lavur e ch'il sponsur principal resta fidaivel al club.
Ina visiun a lunga vista
Malgrà las sfidas actualas ha l’EHC Arosa definì ina finamira clera: Entaifer tschintg onns vul il club s'etablir en la segunda liga da hockey sin glatsch en svizra, la Swiss League. Ultra da la construcziun d’ina squadra cumpetitiva è la tschertga da novs sponsurs in punct central. Ils responsabels speran da dar nov schlantsch a la passiun per il hockey sin glatsch ad Arosa e da far reviver ils temps da success dal club.