Siglir tar il cuntegn

Header

cuntegn

Ski alpin La Svizra è ina classa meglra che l'Austria

Actualmain dominescha la Svizra il circus da skis. Ils Austriacs na vegnan betg da tegnair pitg ad Odermatt, Gut-Behrami, Meillard u Holdener.

Il classament da naziuns ha dapi onns e decennis ina gronda muntada per la Svizra e l'Austria. Igl è il classament che mussa tgi ch'è propi la numera 1 en il sport da ski alpin. Dal 1989/1990 fin il 2018/2019 è l'Austria stada mintg'onn la meglra naziun da skis. La sesiun 2019/2020 è quest «titel» turnà suenter passa 30 onns puspè en Svizra. Ils ultims onns èsi lura adina stà in stretg cumbatt tranter las duas naziuns da skis. L'onn passà, per exempel, han ils Austriacs gudagnà cun bun 200 puncts avantatg sin ils Svizzers.

audio
Svizra dominescha enfin uss
ord Actualitad dals 16.01.2023. Maletg: Keystone
laschar ir. Durada: 5 minutas 27 Secundas.

La Svizra ina classa per sasez

Discuttar tgi ch'è questa stagiun la meglra naziun da skis na fa nagin senn. Memia dominanta è la Svizra. Actualmain, suenter bun la mesadad da la stagiun 2022/2023 è l'avantatg sin l'Austria 1'578 puncts. In'immensa differenza sch'ins pensa ch'ina victoria en la cuppa mundiala dat 100 puncts.

Stan dals 16-01-2023 Umens Dunnas Puncts totals
1. Svizra 3436 2842 6278
2. Austria 2554 2146 4700
3. Norvegia 2702 1008 3710
4. Italia 1044 2347 3391
5. Stadis Unids 606 1732 2338
6. Frantscha 1396 762 2158
7. Germania 946 700 1646
8. Canada 641 561 1202
9. Svezia 86 917 1003
10. Slovenia 424 569 993

Motivs per questa gronda differenza tranter la Svizra e l'Austria datti plirs:

  • La Svizra ha actualmain pliras atletas ch'èn en topfurma. Spezialmain natiralmein Marco Odermatt ch'è en la furma da la vita ed ha gia rimnà 1'186 puncts. 5 victorias ha el gia festivà questa stagiun. Ma er Lara Gut-Behrami. Wendy Holdener u Loïc Meillard èn actualmain adina buns per ina plazza da podest.
  • Er la segunda garda svizra persvada. Per exempel èn era gia in Stefan Rogentin u ina Joana Hählen stads buns per plazzas da podest.
  • La flaivlezza austriaca gioga er ina rolla. Pir duas victorias hai dà per l'entira squadra austriaca questa stagiun. Duas giadas ha Vincent Kriechmayr triumfà en ina cursa rapida. Las dunnas austriacas n'han percunter anc gudagnà betg ina cursa.

La Svizra è durant questa stagiun la clera numera 1 en il circus da skis. Ins po resumar questa clera differenza tranter las duas naziuns da skis cun dus pleds che vegnan anc savens duvrads per englais e tudestg en la lingua da sport: La Svizra fa actualmain il «überperformen» e l'Austria il «unterperformen». Pia la Svizra è anc meglra che quai ch'i era da spetgar e l'Austria è mendra ch'è quai ch'i era da spetgar.

RTR actualitad 17:30

Artitgels legids il pli savens